Skolvan y Mercedes Peón, l'apueste del vienres en Mieres

En cuantes a lo que ye música, la Folixa de Mieres presenta güei vienres un interesante cartel nel que van tar los bretones Skolvan, qu'entamen a tocar sobre les 11 de la nueche, xunta l'artista gallega Mercedes Peon.

Los bretones Skolvan , fundaos en 1984, por Youenn Le Bihan, Gilles le Bigot, Fañch Landreau y Yann-Fañch Perroches, que dempués dexaría'l grupu p'axuntase a Filaj y Les Ours du Scorf. Yann-Fañch Perroches dexó tamién el grupu pa grabar un discu de cursión en solitario entituláu An droug Hirnez. Dempués de venti años andaos y dempués de trallase en bien de Fest-Nozs per tola xeografía bretona, solamente trés son los discos del grupu. El primer y bien conocíu Come to the Dance tres del que vieno Swing and Tears. Más de recién ye Cheñchet'n eus an amzer que se grabó dempués de los cambeos de formación pelos que pasó'l grupu, anque l'alma de la formación ye, como nel 84, Youenn Le Bihan, ún de los meyores gaiteros bretones y un luthier que tien creaos instrumentos de diseñu propiu, casu de la "bombarda de pistón", un entemecío de la bombarda y l'oboe. Xunta Youenn, la fomación de Skolvan complétenla Bernard Le Dréau al saxu soprano Loïg Troel na curdión diatónica y Gilles le Bigot, ún de los meyores guitarreros de Bretaña quien tien participao amás d'en Skolvan nes formaciones de Kornog, Barzaz o Héritage des Celtes

Tres d'ellos, la gaitera gallega Mercedes Peon va presentar el discu que tien acabante d'estrenar cola casa discos "Resistencia" y que s'entitula "Insue". Trés años de trabayu son los que tan tres d'esti nuevu discu nel que la música gallega, que tien trabayao con xente comoManu Chao, Carlos Núñez o Antón Reixa, s'atreve a amestar dacuando ritmos africanos a composiciones recoyíes de la tradición oral del país vecín. Peón cuenta siempres que descubrió la tradición musical gallega a los 13 años cuando taba d'acampada con unes amigues na Costa da Morte y vio a unes muyeres cantando. D'entós p'acá Mercedes Peón anduvo caleyando per toa Galicia y presume de tener un estoyu con cientos de grabaciones de xente interpretando los cantares de la tradición gallega. Isué ye'l primer discu que sal de referver tou esi patrimoniu que lleva recoyendo dende va venti años.