Skanda vuelve al rock

Anque en verdá nunca lo abandonaron, el grupu mierense presenta un discu contundente como yá anuncia'l so títulu, "Sangre d'Ochobre".

Na mañana d'ayeri presentóse a la prensa nos locales de la SGAE n'Uviéu'l tercer trabayu discográficu de "Skanda", que sal a la cai cola discográfica "L'Aguañaz". Ellí tuvieron Xune Elipe como representante de la casa de discos, Xosé Mayordomo guitarrista del grupu, Pepe Fueyo guitarrista acústicu y cantante, Ana de la Fuente vigulinera del grupu y Marco Castañón cola gaita y la xiblata, el restu de músicos de la banda que nun tuvieron ellí son el batería Xuan Oliva y Pablo Souto baxista.

Dende que la banda nació en 1997 la banda sigue'l so propio camín, dalgunes vegaes como ellos comenten "a contracorriente". Dempués del so primer discu "Skanda" ficieron un segundu cd nel qu'apostaben per una llinia más folk que llevo'l nome de "Mecigaya". Con "Sangre d'ochobre" el grupu vuelve más al rock como llinia fundamental, pero'l soníu de "Skanda" caracterizase principalmente pola mezcolanza d'estilos bien diferentes, blues, pop, funk y el siempre presente folk. A la fin topamos al rock de la mano del folk con pincelaes de tolos estilos qu'enantes comentábamos. Otra de les característiques principales del discu ye que na banda cada vez son más los temes cantaos, de los diez temes del discu cinco son cantaos con lletres que les más de les veces son un recuerdu a les persones que tuvieron naquella revolución de 1934 n'Asturies, que yá recuerden col títulu del discu.

Les collaboraciones son tamién un puntu importante del cd, les pandereteres del grupu Xorrecer, Pablo Álvarez y Jorge Areces de la Banda de Gaites "Villa de Mieres", Oti Méndez y Xune Elipe poniendo la so voz, Lisardo Prieto col vigulín. Rescampla l'aportación estranxera col gaiteru irlandés John McSherry que grabó nun de los temes cola Uilleann Pipe.

En resumen un discu onde los propios músicos de "Skanda" siguen esplorándose a si mesmos, y ver que sal de dir amestando tantes influencies diferentes.