Skama la Rede y Ochobre participen na inauguración de la sala de conciertos Franelrock

L'espaciu uviedín acueye actuaciones de baldre dende'l xueves hasta'l sábadu de magar les 21 hores. El vienres la música n'asturianu va ser protagonista.

Tres meses trabayando nel afayamientu del llocal y nel algame de les llicencies necesaries, la promotora FranelRock abre les puertes de la primer sala de conciertos d'Asturies pensada como tal: un llugar fechu pa conciertos d'aforu mediu con escenariu grande y facilidaes pa los grupos y pal públicu. Pa ello, entama trés conciertos de baldre dende güei y hasta'l vienres.

GPS Project y El Trío Calavera van encargase d'inaugurar la sala asitiada n'El Postigu Baxu númberu 19 esta nueche, pa mañana dar pasu a Skama la Rede y Ochobre, bandes que se carautericen por emplegar la llingua asturiana. Completen esta estrena Westhia y Druidas el sábadu.

Grupos de primer nivel

Franelrock yá tien preparada una axenda de conciertos importante pa los meses próximos, ente los que destaca la presencia de la histórica banda de metal Hamlet el 18 de marzu o l'actuación de Blaze Bayley, ex cantante d'Iron Maiden, trés díes depués, ente otros.