Skama la Rede y La Col.lá Propinde ponen actuación nes fiestes de Ciañu.

Les actividaes de les fiestes de Ciañu (Llangréu) entamen esti vienres col pregón de Francisco González Zapico y nelles van tener especial importancia les actuaciones musicales, colos grupos Skama la Rede y La Col.lá Propinde, wue van tener llugar esti día 8. Un viaxe musical a la época de los 60 coles actuaciones de Los Brincos (sábadu 9 a les 23:00 hores) y Los Mismos (domingu 10 a les 23:30 hores) van completar la parte musical de les fiestes. Amás d'esto, verbenes, marches ciclistes o una concentración de motos faen el cartel d'estes fiestes del Corpus Christi de Ciañu 2007 que rematen, como ye vezu, cola xira del llunes y una espicha nel cine Ideal.

Tocante a los grupos qu'actúen,

La Col.lá Propinde nació a primeros del añu 2000 col envís de facer un folk que, ensin tar lloñe de les bases tradicionales de la música asturiana y raíces celtes avérase a les nueves alternatives dando como resultáu un soníu frescu, folixeru y mui comprometíu coles realidades sociales. Tienen dos discos asoleyaos col sellu discográficu L'Aguañaz, L.l nel añu 2003 (Dientro atopamos la canción l'emigrante, cantar premiáu como meyor cantar n'asturianu del 2003) y Güeria, discu que saliera va poco al mercáu, onde la fusión se fai sintir xunto cola música tradicional asturiana Amás, esti mesmu añu, collaboraron col raperu Dark la eMe ("Un asturiano en Madrid"), pal so caberu discu ("Chigre y dragón") cola canción "mi compromiso".

Pela so parte, Skama la Rede, formose en setiembre de 2003 de la xuntanza de dellos músicos de la zona Peñes col enfotu de formar un grupu de bases ska con influyencies rock, punk y folk, emplegando la trompeta y la gaita asturiana nos sos temes. Dempués de publicar La Nuesa Historia nel añu 2005, Skama la Rede ta acabante de poner na cai Echaos a la mar el so segundu disco. Esti grupu rock influenciáu pol estilu 'ska', convirtióse yá col so primer discu nuna de les principales referencies de la música rockera asturiana. Nesti segundu álbum afonden na propuesta del primer discu y xuben el nivel de soníu. Doce cantares son los qu'inclúi esti segundu discu y nellos amuesen con ironía y reflexón la situación social y política d'Asturies.