Skama la Rede va conmemorar el venti aniversariu del so debú con un discu-llibru

Los integrantes de Skama la Rede entraron esta selmana al estudiu pa grabar los cantares del que va ser el quintu trabayu de la banda. Ésti va consistir nun discu-llibru con collaboraciones, un formatu especial pa conmemorar los venti años del primer conciertu de la formación.

Anque se formase nel 2003, sería nel 2004 cuando tocaron per primer vez, en Candás. Foi nel mes de febreru nun concursu musical onde’l vieyu depósitu d’agua del parque de Les Conserveres, al que-y siguieron decenes de conciertos más nestes dos décades.

Nuna fecha tan especial, y diez años depués del so álbum físicu últimu, ‘Avante’, la banda apuesta por asoleyar un discu-llibru con cantares nuevos y dalguna actualización, como los cuatro temes grabaos nel 2019 y espublizaos en formatu dixital. Pa ello van contar con collaboraciones de voces conocíes de la escena musical asturiana.

Al CD, previstu pa la seronda, va acompañalu una esbilla de semeyes, entraes, cartelos y recortes de prensa, sobre manera de la dómina primera de Skama La Rede. Tamién dellos testos de xente cercano a la banda.

En Tutu Estudios

Anque entovía ta pendiente la escoyeta del nome y el diseñu del llibru, el grupu yá entamó col trabayu d’estudiu. Dende esta selaman yá tien como centru d’operaciones Tutu Estudios, col productor Sergio Rodríguez, responsable del soníu de toles grabaciones de Skama la Rede, al frente.

Al empar, la banda tien abierta la contratación de cara a estos meses, con una decena de feches zarraes que va dir confirmando en feches próximes. Tamién va asoleyar material nuevu pa comercializar.

Na semeya, un momentu d'una actuación de Skama la Rede nel festival Kuivi Pop Up d'Uviéu.