Skama la Rede torna a los escenarios en Navarra

Va tocar nel Nafarroa Oinez de Lizarra.

La gran fiesta de les ikastoles navarres, que se retoma llueu de los meses duros de la pandemia, ye'l llugar onde Skama la Rede va tornar a los escenarios tamién depués de munchu tiempu de parón obligáu. Va ser el domingu, a les 15 hores na plaza de toros llocal depués de Zaunka y d'Onki Xin, y enantes de Raimundo el Canastero.

Ye una de les munches actividaes que van tener llugar mañana y el domingu con motivu d'esti eventu itinerante qu'entama Ikastolen Elkartea en defensa y promoción del eusquera y la cultura vasca. Amás, ye una edición especial na que va tocar la banda asturiana, yá que se celebra'l cincuenta aniversariu de Lizarra Ikastola, cumplíu nel 2020, que s'encarga esti añu de la organización.

Na imaxe, logu d'esta edición del Nafarroa Oinez, que se celebra baxo'l lema 'Hegan oinez', que se podría tornar como volar caminando.