Skama la Rede pon a bailar a Tierra Astur a ritmu de ska

Tuvo que pidir perdón el vocalista de Skama la Rede, Burilo, a los que "nun sabíen que veníamos". Nun yera una de les habituales actuaciones de Tierra Astur. Los que taben nel escenariu diben facer algo más de ruiu de lo avezao.

Tuvo que pidir perdón el vocalista de Skama la Rede, Burilo, a los que "nun sabíen que veníamos". El detalle yera obligáu. Nun yera una de les habituales actuaciones de Tierra Astur. Los que taben nel escenariu diben facer algo más de ruiu de lo avezao nes espiches-conciertos de los xueves, y los que taben cenando tranquilamente nes meses del comedor diben tenelo un poco más complicao pa facer la dixestión.
  
Precisamente por ello, la organización modificó'l plan innicial, y en cuenta de facer dos pases, cola espicha pel mediu, decidió solventase la fatura primero y dempués facer el conciertu dafechu.
  
Asina, colos frixuelos y les casadielles tovía calientes y los chupitos d'arándanos circulando ente'l personal, los acordes de 'Sarxentu retonda' dieron entamu a la folixa. La necesaria claudicación de Burilo nun se fizo esperar. Hincha acérrime de Marino de Lluanco, llocutor deportivu de la RPA y acabante llegar de tresmitir cómo'l so eternu rival, el Candás, ganaba la Copa Federación, nun tuvo otru remediu que dedicar el conciertu a l'afición candasina.
  
Con 'Ye too mentira' empezó la xente a dar los primeros saltos, y los de Tierra Astur optaron por retirar les primeres meses. La espicha-conciertu dexó de ser espicha y quedó en sólo en conciertu. Y asina foi, anque la sidra nun paró de correr ente los siguidores 'skameros' en nengún momentu.
  
Fueron cayendo ún tres d'otru los temes, principalmente del  nuevu discu, ente ellos 'Nieva sobre moyao', 'La nuesa realidá', 'SOS Fame en Tapia' o 'Yes mongol', que dedicó a José Luis Moreno. Interceláronse los "grandes éxitos" como 'Asturies Borracha', 'El dueñu'l mundu' o, como non, 'Campu de Batalla' pa mayor gozu de los comensales concierteros, algo más paraos de lo normal nes actauciones de la banda candaso-maliaya-lluanquina.
  
Pero la d'ayeri yera una ocasión especial. Asina lo entendieron los de Skama, que regalaron a los munchos asistentes una versión ska acelerada del 'Chacho' de Los Berrones, que la xente agradeció enforma. Famélicu de temes clásicos, el públicu pidió 'Güel a Macarrón' y el grupu contestó con 'Mierdina d'Or', p'acabar repitiendo con 'Campu de Batalla' a eso de les doce y media la nueche.
  
Nun hubo tiempu pa más, pero sí ganes, motivu pol que la xente tuvo qu'acabar cantando a capela soi de verdiciu con Xandru (gaiteru) y Fonsu (baxu). Ye lo que tien meter el rock en Tierra Astur. A la xente siempre acaba sabiéndo-y a poco. Pasó lo mesmo con Dixebra l'añu pasáu. Lluis Nel Estrada va tener que dir pensando en montar una espicha-festival.