El grupu de Ska Skama la Rede ta acabante de finar la grabación de la so primer maqueta que lleva'l títulu de "Hestories Absurdes".
El grupu, que tien componentes de Lluanco y Candás, dio'l remate esti sábadu pasáu la grabación d'esta maqueta, que tien cinco cantares que son Menudu País, Coses de la Edá, Día de Comedia, El Dueñu'l Mundiu y Campu de Batalla. La grabación féxose nos estudios Palomar de Lluanco col técnicu de soníu Andrés Rodríguez, y dientro d'unes selmanes va entamar una pequeña distribución de la grabación. Pa sentir un anticipu podéis dir a la web del grupu onde ta pa descargar un cantar de la mesma.
Per otru llau la banda v a metese muncho pelos escenarios esti mes de mayu. De mano, esti sábadu 1º de Mayu van tocar en Llión xunta otres dos bandes, "Gandalla" y los vascos "Esclerosis".Pa esti conciertu hai organizáu un viaxe dende Candás sobre'l que pue sacase más información nel chigre "La gueta". Amás d'ello, el 14 y 15 de mayu Skama la rede van participar nel primer Festival Rock de Pravia del que yá informáremos nesta mesma sección.