Skama la Rede defende a Asturies esti sábadu nel Liet International

Esti sábadu va celebrase n’Udin (Friûl) una edición nueva del Liet International, festival de la canción en llingües minorizaes. Skama la Rede va representar a Asturies nesti certame col cantar ‘Condenáu’.
 
Los asturianos van competir xunto con once aspirantes pa conseguir l’apoyu del xuráu y del públicu y trayer el premiu per primer vegada p’Asturies. El llistáu de participantes nesta ocasión ta conformáu por Noid (Karelia), Rolffa (Sami), Macanta (Alba), Silent Woo Gore (Udmurt Elkun/República d’Udmurtia), Siroka (Euskadi), Aoife Scott (Éire), Janna Eijer (Fryslân/Frisia), Priska (Friûl), Coffeshock Company (Burgenland), Cuntra Löm (Ladinia) y Rezia Ladina (Chantun Grischun/Canton de Grisones), amás de Skama la Rede. Doce representantes de comunidaes llingüístiques europees estremaes que se xunen nun ambiente festivu pa reivindicar al traviés de la música los sos raigaños.
 
L’entamu del Liet International nel Teatri Giovanni d’Udin ta previsto pa les 21 hores y va poder sentise n’Asturies gracies al equipu desplazáu por Radio Sele a Friûl, que va tar n’antena a partir de les 19 hores. Tamién ye posible siguir el desarrollu del eventu al traviés de la web del Liet International. Otra manera, Skama la Rede va ufrir un conciertu na folixa que va tener llugar tres el festival.