Sirvent presentó'l poemariu 'El reló de Sherlock Holmes'

La escritora praviana tuvo acompañada pol poeta Luis Acebal nel actu celebráu esti llunes na Librería Cervantes d'Uviéu.

'El reló de Sherlock Holmes', númberu 3 de la coleición 'Patache' de Saltadera, ye'l primer llibru n'asturianu d'Alejandra Sirvent, qu'alterna la escritura en llingua asturiana y en castellanu. Acebal presentó l'actu y nes sos pallabres resaltó la espresividá qu'algama l'autora escribiendo na so llingua materna, pa establecer darréu un coloquiu poéticu d'altor cola autora, nel que se fixo repás de les claves lliteraries de Sirvent: el pasu del tiempu, al que se refier la primer parte del títulu de la obra; y la indagación poética, detectivesca y lliteraria, que queda reflexada na segunda parte d'esi mesmu títulu al referise a Sherlock Holmes.

D'igual forma, fixéronse múltiples alusiones a la xenealoxía poética de la praviana, recitando poemes de la lliteratura universal. Acebal tamién destacó'l fechu de qu'esta poesía fale del mundu, ensin que'l llector tope nella necesariamente paisaxes o paisanaxes asturianos.

Mancar cola pregunta

Na poesía de Sirvent, qu’aspira a la belleza consciente de la dura realidá d’un mundu al empar guapu y terrible, axúntense esperiencia cultural y esperiencia de vida. "Mancar cola pregunta, envede sanar cola rempuesta", escribió la escritora a mou de declaración d’intenciones nuna poética.

"La so obra adiéntrase nos aspectos más escuros del llinguaxe en busca de les realidaes menos obxetives o evidentes. Enrieda cola escritura automática, col puru instintu, pa crear desllumantes imáxenes d’enorme plasticidá, corporales, orgániques, sensibles al tactu, a la vista y al oyíu; construye asina una poesía material, apinada de resonancies metafísiques, de pasión fría", apunten dende Saltadera. Ésta ye "formalmente curiada, con un notable dominiu de la dicción poética y un llinguaxe que se mueve ente la tradición lliteraria y l’asturianu de casa, los versos d’esta autora preséntense arropaos por una selección de símbolos que nun puen ocultar dafechamente la introspección a la que somete la propia vida".

El poemariu nuevu de Sirvent, llicenciada en Derechu pola Universidá d'Uviéu, ye'l cuartu llibru qu'espubliza l'autora nacida nel 1980, tres 'Aquel amanecer' (Premio Asturias Joven 1997), de la plaquette 'Última materia' (2005) y de la novela 'Los huéspedes del globo manchado de oro' (2016). La so poesía ta recoyida n’antoloxíes como 'Aere perennius' (2004) y 'La prueba del once' (2015).