Los sindicatos educativos preparen un frente común pa defender les llingües minorizaes frente a la LOMCE

|
Iván Huerga SUATEA xunto a compañeros de sindicatos educativos en Galicia

Iván Huerga, de SUATEA, participó nes xornaes Palavrar a Lingua, entamaes pol Sindicato de Traballadoras e Traballadores do Ensino de Galicia (STEG) en Santiago. Los sindicatos educativos presentes ponen les bases pa facer un frente común de defensa de les llingües minorizaes que va concretase en xunu nun alcuentru en Gasteiz.

Les I Xornadas de Innovación Educativa 'Palavrar a Lingua', destinaes al profesoráu d'Educación Infantil, Primaria y Secundaria y centraes nel tema llingüísticu, celebráronse'l sábadu en Santiago de Compostela. Pa tocar esti tema, STEG convidó a otros sindicatos educativos de territorios con llingua propia federaos en STEs Intersindical, como l'asturianu Sindicatu Unitariu Autónomu de Trabayadores de la Enseñanza d'Asturies (SUATEA), el balear STEI-i y el valencianu STEPV, asina como confederaos como los vascos y navarros de STEE-EILAS o'l catalán USTEC.

Los representantes d'estes organizaciones participaron nuna mesa redonda entitulada 'A situación do galego e das linguas minorizadas no contexto do Estado', onde compartieron esperiencies y respondieron les duldes de los presentes. Huerga foi l'encargáu de contar la situación asturiana, convirtiéndose nuna de les persones más actives de la mesma por mor "del interés tremendu que despierta'l nuesu casu y del desconocimientu grandísimu que se tien fuera del mesmy", señaló.

Na so intervención, Huerga fixo "un repás pela situación de la enseñanza del asturianu, dende los primeros centros pilotos na década de los 80" hasta anguaño, esplicando lo que supunxo'l cambiu llexislativu cola Llei d'Usu y el so incumplimientu, y comentando'l procesu xudicial p'anular los ratios. Sobre l'estatus actual del idioma, el maestru de Llingua Asturiana en Secundaria detalló "el techu de cristal o cementu que topa la materia" nesta etapa educativa na que compite con otres llingües estranxeres "nuna decisión política" y espuso "la grave situación que tenemos en Primaria, que da vergoña contar".

Recopilar esperiencies

Esti alcuentru, que se suma a otru asemeyáu que tuvo llugar en febreru en Navarra, son pa Huerga "mui positivos" pola posibilidá qu'abre "de dar conocer esperiencies d'otros sitios que podríen ser válidos, o non, pa poneles en práutica n'Asturies". D'igual forma, el representante de SUATEA destaca la importancia de que se cuente con Asturies y l'asturianu nesti tipu de foros y la bona rellación, "normal y amable", que se caltién col sindicatu gallegu, enterrando discrepancies del pasáu nes rellaciones entre una oriella y otra del Eo.

L'alcuentru tamién sirvió pa siguir poniendo les bases del frente común qu'estos sindicatos quieren entamar énte'l "rearme castellanocentrista del ministeriu y del Gobiernu central". Asina, estes centrales van acudir en xunu a Gasteiz con propuestes propies pa participar nuna xornada preparación de cara a emitir un documentu conxuntu en setiembre. "Queremos que les llingües minorizaes puedan tener futuru. Defendeles énte la entrada de la LOMCE y el so aparatu llexislativu", afirma Huerga.

L'asturianu pa deprender portugués

Ente les actividaes restantes de la xornada na capital gallega, el maestru tamién quixo destacar el 'Obradoiro de lusofonía' que punxo Carme Saborido, profesora de portugués y miembru de l'Associaçom Galega da Língua (AGAL). Nella, tolos participantes pudieron comprobar cómo "ye absurdo que la enseñanza del portugués se faiga al traviés d'una llingua intermediaria como ye'l castellanu".

Asina, Huerga apuntó qu'un habitante de Tapia tien más facilidá pa comunicase con un portugués emplegando'l gallego-asturiano que'l castellanu y destacó que l'enseñu d'esi idioma na Escuela Oficial d'Idiomes nel restu del país tendría más sentíu n'asturianu pola cercanía ente dambes llingües.

Na semeya, Huerga, terceru pela derecha, xunto col restu de compañeros d'otros territorios que participaron nes xornaes.

Contador Estadistiques