Sindicatos d’AENA anuncien una güelga pa Selmana Santa

Tres el polémicu paru de los controladores aéreos nel nomáu puente de la Constitución, la festividá de Selmana Santa nun se va llibrar de problemes nos aeropuertos. Los sindicatos d’AENA convoquen una güelga pa eses feches.
 
Les estayes sindicales n'AENA d’UXT, CC OO y USO anunciaron güei una convocatoria de güelga en Selmana Santa en tolos centros de la rede del xestor aeroportuariu. “El señor ministru diz que ta negociando, pero la negociación ta rota”, aseguren dende los sindicatos faciendo referencia a les declaraciones realizaes por parte de José Blanco'l llunes. El cabezaleru de Fomentu mostróse daquella confiáu en zarrar un alcuerdu colos sindicatos enantes de Selmana Santa, depués de que miles de trabayadores de la empresa pública salieren el sábadu a la cai pa protestar contra de la privatización del 49 por cientu del ente, negociaciones que paez nun van llegar a bon puertu.
 
Pese a qu'AENA y los sindicatos convocantes de la güelga firmaron un primer alcuerdu pa estender el conveniu actual a tol grupu, los representantes sindicales dieron por rotes les negociaciones el 18 de febreru pasáu al entender que nun yera garantía abondo y que nun s'avanzaba a la hora de detallar cómo se van reflexar los derechos de los trabayadores que pasen a les empreses concesionaries que s'ocupen de la xestión de Madrid-Barajas y Barcelona-El Prat. Los trabayadores temen qu'a estos dos aeropuertos los sigan el de Palma Mallorca y el de Málaga. “Los ingresos de los aeropuertos rentables van repartíselos les empreses privaes y la ciudadanía va tener que pagar colos sos impuestos los aeropuertos deficitarios”, alvierten.