Sigue'l casu del faisán de la braña de Mumián

El faisán montés de la Braña de Mumián (Somiedu) sigue dando guerra dempués de muertu. El casu del exemplar fallecíu d'esta especie protexida y en peligru de desanicie que morrió dempués de que la guardería del Principáu lu sacare del llugar onde taba asitiáu dio llugar esta selmana a que'l Partíu Popular presentare na Xunta Xeneral del Principáu una batería d'entrugues empobinaes al Conseyu de Gobiernu pa esclariar les circunstancies nes que morrió l'animal.

Les entrugues del PP céntrense nes causes científiques concretes qu'encamentaron el treslláu del animal xunta conocer tolos detalles de los resultaos de la necropsia y si va a continuar la Conseyería con el programa de radiomarcaxe de la especie dempués d'esti casu y tamién que se diga a qué espertos y organismos concretos se-yos pidió opinión pa decidir el treslláu del faisán hasta'l valle de Pigüeña

La necropsia definitiva fecha pol Institutu d'Investigación en Recursos Cinexéticos de Ciudá Real diz que foron factores que condicionaron la muerte del animal l'estrés de la captura y tamién los factores ambientales nel intre de devolver al faisán al monte.

L'informe de la necropsia alvierte tamién de perda de pluma y rozadures en pescuezu del animal y perda de texíos por depredación na cara de dientro del ala de la izquierda y pa la parte del femur y la tibia de la estremidá posterior izquierda y paré abdominal de la izquierda.

Aparte de les entrugues del PP, l'asociación ecoloxista Amigos de la Naturaleza d'Asturies (ANA) tamién ta acabante de poner una denuncia en xulgáu énte'l Fiscal Mediuambiental d'Asturies por esti asuntu. Pa últimos d'esta selmana grupos conservacionistes encabezaos pola Coordinadora Ornitolóxica Asturiana van dar una rueda de prensa na que van facer pública la so opinión sobre esti grave asuntu y van apurrir tamién información nuevo.

Ente les últimes novedaes d'esti casu tan revesosu, sábese agora que'l faisán taba asitiáu nun colláu enriba la braña y separtáu d'ella, y non na mesma Braña de Mumián, llugar de pasu d'escursionistes a los que supuestamente atacaba l'animal bederre, motivu que llevó a los técnicos de la Conseyería a sacalu del llugar.