Sigue medrando'l númberu de positivos

La Conseyería de Salú confirmó güei 33 nuevos positivos de coronavirus, 7 de los cualos son contactos estrechos de casos conocíos y otros 2 tienen relación coles comunidaes de Madrid y Aragón.

El Principáu ta investigando les andaes restantes para establecer el so venceyu epidemiolóxicu. El Serviciu de Vixilancia Epidemiolóxica realiza l'estudiu de contactos estrechos de toos y cada unu de los positivos confirmaos pa poder detectar posibles nuevos venceyos.

Toles persones infectaes, sacante una que foi hospitalizada, presenten síntomes leves de la enfermedá y permanecen n'aislamientu nes sos cases

La Conseyería de Salú pide a la ciudadanía qu'estreme les midíes de seguridá énte la covid-19 pa protexer a les persones mayores, unu de los colectivos más vulnerables a les andaes.

Les autoridaes sanitaries aportunen en que ye imprescindible guardar una distancia mínima d'un metru y mediu con persones coles que nun se convive. Igualmente, encamienten a la población a evitar les aglomeraciones y les actividaes sociales innecesaries pa frenar la trasmisión del virus.

Tamién encamienten la llavadura de manos con xabón y recuerden la obligatoriedá del usu del mázcaru pa mayores de seis años nes víes públiques y espacios al campu; en cualquier espaciu zarráu d'usu públicu o que s'atope abiertu al públicu, según nos medios de tresporte públicos y privaos; nesti últimu casu, cuando los ocupantes nun convivan.