Sigue la protesta en Salave

La plataforma "Oro No" celebra la decisión del Gobiernu asturianu, que la selmana pasada aprebó en Conseyu de Gobiernu nun concedé-y permisu a la empresa Río Narcea Gold Mines pa entamar la mina d'oru a cielu abierto que proyectaba en conceyu de Tapia y qu'amenazaba con estrozar un llugar de gran importancia polos sos valores naturales.

Con too y con ello, la plataforma nun tien pa ella que'l so llabor tea yá termináu cola negativa del executivu asturianu al proyectu mineru. Pa "Oro no" ye vital garantizar la protección del llugar d'Os llagos de Silva, y por ello va siguir organizando dende esti mesmu día 8 d'agostu una concentración selmanal que va tener d'escenariu la plaza de la Casa Conceyu de Tapia y que va facese a les 12 del mediudía un llunes tres d'otru col oxetivu de conseguir pa Os Llagos de Silva un status oficial de protección mediuambiental que blinde definitivamente'l llugar de cualquier intentu futuru por estrayer la riqueza aurífera del so subsuelu.

Más información na web de l'Asociación de Vecinos "Ameicer"