Sigue la polémica pola llinia d'alta tensión

El veteranu economista Juan Velarde, que tuviere gran protagonismu mediáticu va delles selmanes poles sos opiniones sobre l'asturianu, volvió ayeri al primer planu al traviés de les páxines del diariu La Nueva España, dende les qu'echó contra los vecinos y plataformes opuestes a la llinia d'alta tensión que se proyecta ente Lada y Velilla, y que pa Velarde pue suponer un instrumentu pal desarrollu d'Asturies nun momentu de crisis amás d'un preséu imprescindible pol consumu d'enerxía que se prevé.

Les palabres de Velarde alcontraron la rempuesta de Paco Ramos, representante d'Ecoloxistes n'Acción Asturies, que desmontó tolos presupuestos en que se teníen les opiniones de Velarde. Pa Ramos, qu'España precisa d'enerxía nun se tien cuando l'Estáu Español, a datos del 2004, vendió más corriente a los sos estaos vecinos de lo qu'importó d'ellos, colo que l'estáu nun ye dependiente en fluidu, pero sí en fontes primaries como carbón, gas o petróleu. Ramos pregúntase tamién que-yos diría Velarde a los gobiernos d'otres comunidaes autónomes nes que se presenten
bien de proyectos de centrales térmiques colos que nel futuru nenguna comunidá va ser importadora de corriente , un panorama que pue facer la corriente asturiano innecesario y con ello la mesma llinia Lada - Velilla.


Les declaraciones de Velarde asoleyáronse na viéspora de la presentación d'un manifiestu nel que más de 200 intelectuales y profesionales d'una parte y otra de la cordal cantábrica refugaron la construcción de la llinia. La escritora asturiana Ángeles Caso, que foi la encargada de lleer el manifiestu esta mañana en Lleón, sorrayó que nel casu asturianu, amás del impactu de les torretes eléctriques nos montes d'Ayer, ta tamién el gravísimu dañu que van facer les centrales térmiques que-y van apurrir la corriente a la llinia y que van tar toes n'Asturies. Ángeles Caso llamó l'atención sobre'l fechu de qu'Asturies, con tener el 2% de la población d'España, aporta'l 8% de les emisiones de gases efectu invernaderu del Estáu y perpasa los compromisos del protocolu de Kyoto en más d'un 30%, un desequilibriu qu'esta llinia nun diba facer otro qu'agravar al afalar la construcción de más centrales na parte asturiana del trazáu.