Sigue la polémica en Llangréu

Mañana ye'l plenu del Ayuntamientu de llangréu que tendrá que decidir sobre l'anulación de la declaración d'oficialidá por parte del Tribunal Superior de Xusticia d'Asturies. Si ayeri reproducíemos les declaraciones que fizo p'Asturies.com el conceyal socialista Emilio Granda sobre esta tema, güei falamos con Alejandro López, conceyal d'Izquierda Xunida, que nos espresó'l so puntu de vista.El conceyal d'IX esplicó a Asturies.com que'l so grupu nun sabe nada seguro sobre la iniciativa socialista de pidir la reforma del estatutu pa qu'incluya la oficialidá, anque dixo que si la propuesta socialista ye como lo que salió en prensa, ellos votaríenla a favor, arriendes de siguir col recursu énte'l Tribunal Superior. Sicasí, el representante d'IX dixo que, esta mañana, el PSOE llangreanu entovía nun presentare papel nengún en rexistru sobre esti asuntu, anque hasta l'últimu momentu ye posible que llegue (el plenu ye mañana a les seyes de la tarde). López criticó esta actitú del PSOE de nun presentar les coses en tiempu y forma, y dixo que los socialistes yá tienen fecho esto n'otros debates importantes pal conceyu.Pa Izquierda Xunida de Llangréu, el PSOE ta xugando a dos cartes nesta tema, porque mientres en Llangréu faen declaraciones "cara a la galería" pidiendo que se reforme l'estatutu, n'Uviéu la postura de la FSA ye contraria a la oficialidá. Alejandro López criticó esta manera d'actuar que calificó de incoherente, y remarcó la situación tan favorable que tien la FSA-PSOE cola so mayoría absoluta na Xunta Xeneral del Principáu, si de verdá quier dar el pasu alantre de la oficialidá. López camienta que la contradicción de la doctrina de la FSA-PSOE colo que sostién el so grupu municipal en Llangréu tendría que llevar a los conceyales socialistes bien a pasase al grupu mistu o bien a "marchar pa casa"Sobre'l fechu de que la sentencia anulatoria llegare con un añu de retrasu al Ayuntamientu, Alejandro esplicó qu'eso foi asina por un error alministrativu, ensin qu'haya que da-y munches más vueltes nin andar acusando a nengún funcionariu. Otramiente, el que la sentencia llegare tarde namás supondría un problema cola tema de los plazos pa recurrila, cosa que s'esconxuró gracies al recursu de casación que'l conceyu yá tien puestu sobre esti asuntu.Entrugáu sobre'l cambéu d'actitú énte l'asturianu de los socialistes llangreanos, el conceyal d'IX esplicó que les campañes empobinaes pol conceyu y el clima de normalidá en que vienen desenvolviéndose les coses dende l'aprobación de la oficialidá p'acá valieron pa que los partíos de la oposición tomaren una actitú más positiva y desprexuiciada. Pa García, el cambéu tamién s'acusa nel PP local, que, ensin apostar en nengún momentu pola oficialidá, sí que voto al favor de les ordenances municipales d'usu y ta trabayando nel camín de faceles concuellar colos conteníos de la llei d'usu.

Contador Estadistiques