Siete grupos ecoloxistes piden esplicaciones poles batíes de llobos nel Cuera

Siete grupos conservacionistes asturianos mandaron esta selmana una carta formal al Director de Mediu Natural del Gobiernu d'Asturies Cristino Ruano solicitándo-y información detallao sobre "los motivos técnicos y sociales" que llevaron al so departamentu a anunciar que contratar cazadores para batir a los llobos que queden na Sierra del Cuera, nel oriente d'Asturies.

Los ecoloxistes afirmen que'l Plan de Xestión del Llobu n'Asturies ye claru a la hora d'apautar que los controles correspuénde-y n'esclusiva a la Guardería de Montes, cuerpu profesional qu'amás, según espliquen los grupos conservacionistes "tien conocimientu de de técniques de captura del llobu que los tiradores "desconocen y deben desconocer", siendo amás el fechu de dexar el llobu en manes de cazadores una recalificación de la especie como "cinexética" cuando nun lo ye, al paecer de los siete grupos, ente los que tan la Coordinadora Ecoloxista d'Asturies, Ecoloxistes n'Aicion d'Asturies, la Plataforma pa la Defensa de la Cordillera Cantábrica o la Coordinadora Ornitoloxica d'Asturies.

Sicasí, el puntu onde más se condena l'acción de Mediu Ambiente ye nel fechu de que "s'acepten les presiones de los ganaderos del Cuera y se-yos autorice'l contratalos a ellos mesmos como cazadores pa tenelos contentos". Al paecer de los conservacionistes ello cría un vaciu llegal y "permite qu'otros cazadores y ganaderos d'otres zones con daños, pidan tamién qu'a ellos se-yos dexe cazar llobos, colo qu'hai riesgu de que se nos llene'l monte de cazadores d'especies selvaxes". Ello, según los conservacionistes cuando Mediu Ambiente reconoz qu'esiste una mengua de los daños al ganáu pol llobu nos últimos años .