Siete grupos de dellos estilos n’asturianu actúen esti sábadu nel XXVI Conciertu pola Oficialidá

La fiesta reivindicativa de la oficialidá de la llingua asturiana va tener llugar el sábadu en Xixón nun escenariu nuevu: la esplanada frente al Acuariu de la playa d’El Natahoyo. Siete grupos de dellos estilos n'asturianu participen nesta edición.

 

Tres la bona esperiencia del añu pasáu, la Xunta pola Defensa de la Llingua Asturiana (XDLA) y Xunta Moza caltienen xunu como mes pa la celebración d’esta cita añal y Xixón como sede, anque l’aniciu de les obres del pozu de tormentes que va construyise nel Parque de los Hermanos Castro –conocíu de manera popular como’l Parque Inglés– llevó a la organización a treslladar el conciertu al barriu d’El Natahoyo. Asina, na mesma esplanada onde tienen llugar les actuaciones importantes de la Selmana Grande xixonesa yá ta instalada una carpa de grandes dimensiones por si’l Nuberu fixera de les suyes, anque los pronósticos de l’Axencia Estatal de Meteoroloxía (AEMET) dan probabilidaes mínimes de lluvia pa la tarde-nueche de mañana.

 

L’apertura de puertes ta prevista pa les 19 hores y les actuaciones van principiar, con puntualidá máxima, a les 19.30 hores col grupu más esperáu polos pequeños de la casa: Pop Piquiñín. Darréu va xubir al escenariu’l tríu de folk tradicional compuestu por Xosé Antón Fernández ‘Ambás’, Elías García y Pepín de Muñalén, Tuenda, pa siguir col folk-lletrónicu de Xera. El turnu siguiente va ser pal hardcore melódicu de Misiva, dandu pasu depués al mecigayu-ska de La Tarrancha, que va facese acompañar por collacios nesta actuación. L’encargáu de poner el ramu a esta edición del Conciertu pola Oficialidá ye Skama la Rede, anque los que quieran apurar la madrugada na carpa van poder sentir la música del soundsystem asturianu Asgayah Sound, encargaos tamién de pinchar ente grupu y grupu p’animar la folixa. El preciu pa disfrutar d’esta escoyeta de formaciones asturianes qu’utilicen nes sos lletres la llingua asturiana ye de 8 euros, anticipada, y de 10, na puerta.

 

Una pequeña feria del llibru

 

Col oxetivu de da-y visibilidá al llibru n’asturianu, la organización decidió esti añu acutar una zona de la carpa p’aquelles editoriales que quixeran llevar les sos espublizaciones, entamando asina una pequeña feria del llibru –na que tampoco nun van faltar los discos–. Asina, dende les 19 a les 22 hores, de manera aproximada, les persones qu’acudan al Conciertu pola Oficialidá van poder mercar títulos de les editoriales y discográfiques Seronda, VTP, Trabe, AsturtOOns, Pintar-Pintar, Tierra, Balto, Algamar, Suburbia y Goxe.