Siero, Xixón y Cangues d’Onís van acudir al VIII Festival Internacional Máscara Ibérica de Lisboa

Los conceyos de Siero, Xixón y Cangues d’Onís van acudir a Lisboa pa participar nel VIII Festival Internacional Máscara Ibérica, que principia esti xueves. Asturies.com va desplazase a la capital portuguesa pa cubrir esti eventu multitudinariu.

L’alcalde Eduardo Martínez Llosa y los ediles responsables de Promoción Económica y Turismu, Manuel Ballestero y Mauricio Bogomak, representarán al conceyu sierense en Lisboa, mientres que Carlos Rubiera, conceyal d’Educación, Cultura, Xuventú y Fiestes, viaxará en nome de Xixón. Por parte de Cangues d’Onís acudirá l’alcalde José Manuel González y la edil encargada del área de Turismu, María Fe Gómez Alonso. Los trés conceyos van facer promoción turística nun stand conxuntu con otros instituciones y empreses del Estáu español y portugués na Mostra das Regiões, carpa asitiada na Praça do Rossio, onde ye posible facese con productos gastronómicos y artesanía de la mayor parte de países y rexones participantes nel festival nos 26 puestos instalaos.

Los Sidros y Les Comedies, de Valdesoto, van encabezar la delegación asturiana nel mayor certame alredor de les mazcaraes que se celebra na Península Ibérica, eventu capaz d’atrayer a miles de visitantes a la capital portuguesa. La mazcarada sierense participará, acompañaos de La Bandina Principado, nel VII Desfile de la Máscara Ibérica, momentu más esperáu del festival, que va tener llugar el sábadu a les 16.30 hores. Nél participen más de 500 persones pertenecientes a 30 grupos de Portugal, Galicia, Lleón, Zamora, Cáceres, Euskal Herria y Salamanca. Amás, per primer vegada, va caleyar les cais de Lisboa un grupu de fuera de la Península Ibérica, Survakari, de Pernik (Bulgaria).

Apuesta pola gastronomía

Nesta edición del festival , Asturies va facer una apuesta importante pola gastronomía del país, cola presencia en Lisboa de los cocineros Lluis Nel Estrada (Crivencar/Tierra Astur) y Ramón Celorio (xefe de cocina del restaurante Los Arcos, de Cangues d’Onís). Los dos profesionales van participar na estaya ‘Gastronomia e Vinhos Ibéricos’ na tarde del vienres. Asina, a les 19 hores, Estrada va presentar una preba de quesos asturianos maridaos con Vinu de Calidá de Cangas y sidra asturiana, mientres que Celorio va facer darréu una amuesa d’ellaboración de platos típicos de la zona de Cangues. El sábadu al meudía, los visitantes van poder prebar Quesu Gamonéu y sidra asturiana, cedíos pol Conceyu de Cangues d’Onís y de Siero, de manera respeutiva.

El país tamién va tener protagonismu nel apartáu musical, cola actuación de Skanda na estaya ‘Palco Ibérico’, una amuesa de la música que se fai en dellos puntos de la Península Ibérica. Los mierenses van abrir los conciertos de la xornada a les 21 hores, pa depués dar pasu a los gallegos Cuchufellos. Les otres formaciones que van xubise al escenariu mientres el festival son los portugueses Uxukalhus y los castellanos Iratxo, el sábadu; y los portugueses Orquestra de Foles y Diabo a Sete, el domingu.

Asturies.com va desplazase’l vienres a Lisboa pa informar a los sos llectores de toles actividaes con sellu asturianu que tengan llugar nel VII Festival Internacional Máscara Ibérica, cita capaz de movilizar a miles de persones procedentes de tola Península Ibérica que se consolida como un escaparate importante pa la cultura y tradiciones del país.