Siero nun quier l’asturianu na camiseta oficial de la media maratón

El conceyal de Deportes Mauricio Bogomak prohibió l’usu del asturianu na camiseta oficial del XXV Mediu Maratón de Siero. La XDLA calificó la so decisión de modificar na tela’l testu ‘Campeonatu d’Asturies’ d’actitú “asturfóbica”.

Estes trés lletres yeren les úniques que se diferenciaben del castellanu nel diseñu orixinal de la camiseta que se reparte ente tolos participantes d’esta cita deportiva prevista pal 2 de marzu. Una decisión sorprendente, yá que’l Conceyu de Siero venía faciendo, “al traviés del Patronatu de Deportes, un usu normal de la llingua al traviés de la rotulación billingüe de los equipamientos deportivos, midíes que tuvieren l’aceptación pola xente de Siero”, señalen dende la Xunta pola Defensa de la Llingua Asturiana (XDLA). Sicasí, al depender de la conceyalía de Bogomak la política llingüística de Siero, el coleutivu cívicu ve con esmolecimientu la posibilidá de dar avances na normalización llingüística “si la persona que tien les competencies pa visibilizar el nuestru idioma tien tantos prexuicios hacia l’usu del asturianu”. “Nun  pue ser que los sos prexuicios personales supongan un pasu atrás en dalgo que la ciudadanía de Siero yá acepta como dalgo normal”, añaden dende la XDLA.

Pela so parte, l’Asociación Cultural N’Ast reclamó la dimisión de Bogomak por esti fechu: “N’Ast nun sólo quier sumase a la denuncia d’esti casu, sinón que quier pidir públicamente la dimisión de Mauricio Bogomak de los sos cargos nel Ayuntamientu Sieru o que se produza la so destitución por parte del alcalde’l Conceyu”, afirmen nun comunicáu.

Requerimientos en toles conseyeríes

La XDLA, tres presentar a finales de xineru un requerimientu énte Presidencia pa que cumpla la llegalidá en materia toponímica, decidió facer lo propio en cáuna de les conseyeríes del Gobiernu d’Asturies. “En cuasi tola documentación xenerao dende les conseyeríes del Principáu d’Asturies nun s’utiliza’l nome oficial na so forma tradicional, inclumpliéndose polo tanto la llexislación y vulnerándose’l principiu de llegalidá consagráu nos artículos 9 y 103 de la Constitución Española del 1978, ún de los principios fundamentales d’un Estáu de Derechu”. La Xunta pola Defensa de la Llingua Asturiana (XDLA) entiende que, pola escasez de recursos, pueda llevar tiempu’l cambiu progresivu de cartelos o l’actualización de mapes, pero non que nun haya un usu normal de los topónimos nos escritos que l’Alministración produz a diario, lo que ye “un claru incumplimientu d’una Llei dictada pola mesma Alministración”. Por esti motivu, esixe “l’adopción de les midies necesaries pa correxir esta situación”, ensin descartar la posibilidá de “impugnar de manera individualizada cualquier tipu de procedimientu alministrativu procedente de cualquiera de los organismos del Principáu d’Asturies qu’incumplan les formes toponímiques oficiales aprobaes pol mesmu Principáu”.