Siero entama un concursu de canción asturiana en La Pola

El I Concursu de Canción Asturiana Conceyu de Siero yá ye una realidá. Ésti va tar compuestu por cuatro fases eliminatories y una gran final que va celebrase’l 1 de xunetu. El día 10 d’esi mes, una gala va zarrar el certame.
 
D’esta forma, la tonada gana un espaciu perimportante en Siero con un concursu que va contar colos meyores cantantes d’esti estilu nel Auditoriu de La Pola. Anabel Santiago, nome reconocíu de la escena, encárgase de la coordinación d’esti certame que va iniciase’l 5 de xunu, domingu, a les 12 hores, y que va continuar los díes 11, 17 y 25 de xunu, a les 20 hores. El 1 de xunetu, vienres, ta prevista la final a les 20 hores y, el 10 de xunetu, al meudía, una gala especial y la entrega de premios. La entrada a toles actuaciones ye de baldre.
 
El ganador del I Concursu de Canción Asturiana Conceyu de Siero va llevase 700 euros; el segundu, 500; el terceru, 300; el cuartu, 200; y los clasificaos del quintu al decimosegundu, 100. Toos estos, amás, van recibir un troféu conmemorativu. Los participantes nel concursu van tener qu’interpretar dos temes llibres acompañaos na gaita de Valentín Fuente. Los interesaos n’inscribese pueden facelo hasta les 22 hores del 1 de xunu, miércoles, nel teléfonu 689.92.87.86 o nel corréu electrónicu cancionsiero@gmail.com.