Siero diz non al asturianu

Votóse ayeri nun plenu del Conceyu de Siero la propuesta defendida por Izquierda Xunida pa unes ordenances que regularen l'usu del asturianu dientro del ámbitu municipal. Esta propuesta partió de la Xunta pola Defensa de la Llingua depués d'una polémica de la que dio cuenta hai unos meses Asturies.com.
El resultáu de la votación, que cuntó col informe desfavorable del Secretariu municipal, que manifestare previamente la imposibilidá de regular nada nesti sen por nun ser l'asturianu llingua oficial a nivel autonómicu, foi: PSOE en contra: Conceyu en contra; PP nun fueron al plenu y IX a favor.
Hai que notar que en Siero gobierna un tripartitu integráu por PSOE, Conceyu (secesionistas de Llugones) y IX.
Per un llau llama l'atención que los argumentos del secretariu se basen na falta d'Oficialidá y na imposibilidá de regular esti tipu de coses dende los ámbitos municipales cuando en nengún momentu les ordenances presentaes falen d'oficialidá pa Siero, al tiempu que na Llei d'Usu recuéyese la posibilidá de llexislación municipal pa la protección y fomentu del asturianu. Choca tamién que'l PSOE de Nava, embarcáu nuna estratexa d'oposición frontal al alcalde asturianista Xulián Montes promueva y vote a favor d'unes ordenances nesi conceyu mentes que ñega lo mesmo unos kilómetros más p'allá.
Pero sorprende tamién qu'IX, presentara la propuesta con "carácter d'urxencia", anque llevaba dos meses en rexistru municipal y tamién que la llevara p'alantre sabiendo que nun tenía l'apoyu de los sos socios de gobiernu, a pesar de declaraciones anteriores onde falaben que la defensa del asturianu yera ún de los compromisos del pautu, polo que s'alegraben muncho d'esta iniciativa de la Xunta. Daqué asemeyao pasó en Xixón va unos años, cuando IX forzó la votación sabiendo que la tenía perdía. Tamién se sabía de mano que'l PP nun diba dir al Plenu, polo que la xestión de la propuesta foi, a lo menos, peculiar.
Paez que la respuesta de la Xunta pola Defensa de la Llingua nun se va facer esperar. Vamos siguir informándovos.