Sidra d’Asturies va collaborar nuna gala en solidaridá con Haití

El Conseyu Regulador de la Denominación d’Orixe Protexida ‘Sidra d’Asturies’ va ceder bébora pa una gala gastronómica en solidaridá con Haití. El país caribeñu ta tovía en procesu de recuperación del terremotu d’hai un añu y dos meses.
 
La ONG Solidaridad Internacional ye la organizadora d’esta gala gastronómica que va celebrase’l llunes 14 de marzu nel Hotel High Tech President Castellana, de Madrid. Esti coleutivu, que trabaya nel sureste del país caribeñu en llabor d’apoyu a les víctimes del terremotu qu’afectó a la zona’l 12 de xunu del 2010, busca asina recaudar perres pa siguir cola so actividá nel llugar. En concreto, l’aportación de Sidra d’Asturies pa esti eventu va ser de 72 botelles que van servise a la hora de la xinta p’acompañar les raciones pequeñes que conformen el menú, ente ellos platos asturianos como fabada o pitu caleya. Esta xinta, a la que s’espera qu’acudan 200 persones –unes 500 a lo llargo del día, yá que tamién va haber almuerzu y cena solidaria– tien un preciu de 30 euros.
 
Según señalen dende’l Conseyu Regulador, Solidaridad Internacional “defiende la capacidá de la población haitiana pa producir alimentos de calidá que garanticen de mou sostenible la salú y l’autonomía personal y económica de les familias. La meyora de la productividá de les sos parceles permitiría mayores y meyores producciones que elevaríen l’autoconsumu de les families, posibilitaría la tresformación de los productos xeneraos y la venta de escedentes nos mercaos llocales. N’estrecha conexón con esti llabor, la ONG tamién trabaya na sensibilización y difusión de conocimientos sobre salú nutricional, hixene básica y l’usu y manexu afayadizu del agua”. Ello lleva a Sidra d’Asturies a collaborar con esta ONG dientro d’una llinia de trabayu de sofitu a organizaciones solidaries que yá permitió a les persones qu’acuden a la Cocina Económica de Xixón el poder brindar con sidra asturiana DOP nes fiestes navidiegues pasaes.