Seyes años de la reforma del estatutu

Cola entrada del nuevu executivu socialista de Rodríguez Zapatero ta acabante d'abrise una puerte a la reforma de los estatutos d'autonomía del estáu, como dixo'l que yá ye Presidente d'España. La ufierta de Zapatero parez que nun tuvo muncha acoyida n'Asturies, onde'l Presidente asturianu dixo que yera meyor aparcar una reforma estatutaria p'acabar de completar les competencies que concedió la última reforma. Areces tampoco nun negó dafechu una reforma esytatutaria, y dixo que diba haber tiempu a lo llargo de la llexislatura pa tratalo. Sigue asina pendiente l'apertura d'una posible la puerte al reconocimientu de la oficialidá, que foi el gran caballu de batalla na reforma estatutaria del 98.

La polémica coincide col aniversariu d'aquella reforma estaturia, que fai agora seyes años que pasó pel Congresu de los Diputaos tres d'un llargu procesu de debate social y políticu que llevó más de dos años. Manifestaciones de más de quince mil persones nun valieron d'aquella pa conseguir un estatutu más allá d'onde quixeron llevalu los dos partíos mayoritarios, PP y PSOE, anque'l PP llegó a admitir, per boca del mesmu diputáu Isidro Fernández Rozada, la posibilidá d'almitir una oficialidá "diferida" pero espeyada específicamente nel estatutu en casu de que'l PSOE admitiere tamién tala posibilidá, cosa que dempués nun se dio. De cualquier manera, la llingua asturiana ocupó un papel preferente nel procesu que llevó a aquella reforma que se fizo gobernando'l PP n'Asturies con Sergio Marqués y nel estáu con un Aznar que taba nel so primer mandatu y que se tenía pa gobernar n'alcuerdos con formaciones nacionalistes y rexonalistes.

Les fuerces asturianistes axuntáronse daquella nel Pautu pol Autogobiernu y la Oficialidá, una plataforma política cultural y social que tenía a Izquierda Xunida y al Partíu Asturianista como principales partíos políticos implicaos, anque la formación de Sánchez vicente dexaría dempués la plataforma en medio d'un escándalu y acabaría negociando col PP de Marqués l'actual Llei d'Usu del Asturianu, que data d'esi mesmu 1998. Como documentu históricu, el Diariu de Sesiones del Congresu guarda entovía l'acta d'aquel 19 d'abril del 98 en que se debatió la reforma del estatutu asturianu, que salió aprebáu por 288 votos a favor 12 en contra y trés abstenciones.