Seronda n'Avilés cumple venti ediciones celebrando esta estación y les sos tradiciones

La Bandina Cuatrolán, los cántabros Casapalma, Rubén Alba y Nel de Purnea, y José Manuel Tejedor van poner la nota musical.

La celebración de la estación y la puesta en valor de los sos productos típicos y les sos tradiciones ye sobre lo que xira Seronda n'Avilés, que cumple venti ediciones. Güei y mañana la plaza de Les Aceñes va acoyer numberoses actividaes organizaes pola Federación d'Asociaciones Xuntanza Avilés en collaboración col Conceyu.

L'apertura de la carpa ta prevista pa les 19 hores. El públicu va poder consumir nel chigre xestionáu pola Asociación Cultura de Piniella sidra del duernu y castañes, amás de tortos y otros productos, y disfrutar de la música de la Bandina Cuatrolán, con actuaciones na inauguración oficial de les 19.15 hores y nes 21.30 hores, y de los bailles y sones de Xaréu d'Ochobre y Esconta'l Raigañu a les 20 hores, pesllando la xornada a les 22.30 hores un conciertu del dúu de canción montañesa fusionada con electrónica Casapalma.

Xinta popular con pote

L'actividá de mañana arranca al meudía cola Bandina La Xarangana, pa siguir colos cantares de chigre del Orfeón de Castrillón y la xinta popular compuesta por pote de berces y arroz con lleche. De tarde les neñes y neños son protagonistes cola animación 'Misión Samín' dende les 17.15 hores.

La Banda de Música d'Avilés va tocar col grupu de pandereteres Compañeras a les 19 hores, pa dar pasu a les 20.30 hores a la gaita de Rubén Alba y la guitarra de Nel de Purnea. Va poner el ramu a Seronda n'Avilés ún de la casa, José Manuel Tejedor, dende les 21.30 hores con un formatu tríu.

Na semeya, escenariu preparáu na carpa de Les Aceñes p'acoyer toles actuaciones entames por Xuntanza Avilés.