Sergio Marqués ingresáu d’urxencia nel Hospital Central d’Asturies

L'ex - presidente del Gobiernu asturianu y secretariu xeneral d'Unión Renovadora Asturiana sufrió una insuficiencia renal aguda que se-y complicó con problemes de corazón y ta ingresáu dende esti miércoles nel Hospital Central d'Asturies, onde entró per urxencies. L'últimu parte médicu diz que'l políticu alicó del miércoles p'acá y que van facé-y delles prebes pa conocer l'alcance de los sos problemes de reñón. Persones allegaes a Marqués comentaron a Asturies.com que la situación del dirixente de la URAS nun ye grave.

Presidente del Gobiernu asturianu ente 1995 y 1999, Sergio Marqués (Xixón 1946) protagonizó nel añu 1998 una de les mayores crisis polítiques de l'autonomía asturiana al francer col so partíu, el PP, y gobernar en minoría la última fase del so mandatu. Nel 1999, esgayáu yá del PP, presentóse a les autonómiques cola so nueva formación política, la Unión Renovadora Asturiana (URAS), cola que consiguió naquella convocatoria electoral trés escaños en Parlamentu asturianu, representación que nun pudo renovar nes elecciones del 2003, nes quedó ensin representación na cámara autonómica. Esti añu la URAS firmare una alianza col Partíu Asturianista (PAS) pa presentar candidatura conxunta nes autonómiques 2007 na que Sergio Marqués tien de ser el cabeza de llista, anque esiste un compromisu escritu pa qu'en casu d'algamar representación lu releve a los dos años el presidente del PAS Xuan Xosé Sánchez Vicente.