Selce candidatos pol Elíseu

Entamó güei una de les ediciones más competíes de la carrera por ganar l'Elíseu. Selce candidatos tienen que convencer a un electoráu que tien más onde escoyer qu'otres veces. Anque'l socialista Jospin y Chirac, de la gaullista RPR son los favoritos d'unes elecciones que tendrán de llegar a segunda vuelta, y na que'l primeru sal con ventaya según les encuestes, lo que más llama l'atención ye la cantidá de secundarios que se presenten a estes presidenciales. Ente ellos rescampla'l regresu de Jean Marie Le Pen. El resucitáu ultraderechista podría sacar votos abondo -Sofres da-y hasta'l 11%-, pero pela izquierda la trotskista Arlette Laguilier tamién pue quedar sobre lo que saque Le Pen. Otru secundariu de categoría ye Jean Pierre Chevenement, ex-ministru en delles carteres, protagonista de dimisiones escandaloses y que tien hasta l'honor de que daquién se molestare en facer un web pa ponelu pingando. Pa siguir les elecciones franceses hai bien de webs interesantes. Aparte del oficial de la Presidencia de la República, nque trae hasta'l teléfonu de los candidatos, recomendamos los grandes periódicos franceses como Le Monde o Liberation y tampoco nun podemos escaecer el simpaticu sitiu de Presidentielles.org

Contador Estadistiques