Seis profesionales aspiren al cargu de direutor d'Antena y Conteníos de RTPA

El concursu públicu pa ocupar el cargu de direutor d'Antena y Conteníos de RTPA dexó una preseleición de seis candidatos al puestu. Cristóbal Ruitiña y Geno Cuesta, dos profesionales con un perfil favoratible a una mayor presencia del asturianu nos medios de comunicación, tán dientro la escoyeta.

Eduardo González Bonilla, Rafael Reina, Cecilia Fernández Carballo y Ramón Ponga son los otros cuatro aspirantes almitíos provisionalmente. Nos últimos meses, Iniciativa pol Asturianu solicitó que les incorporaciones a les trés places direutives vacantes, esto ye Informativos, Medios Dixitales y la mentada Antena y Conteníos, sían persones que tengan un mayor compromisu cola normalización llingüística “que'l que vien demostrando l’actual direutor xeneral”, perfil que cumplen tanto Ruitiña como Cuesta.

Ruitiña ye redautor por oposición de la RTPA, amás de profesor de la Universidá Carlos III de Madrid y asesor de l'ANECA (Ministeriu d'Educación). Doctor con una tesis sobre la televisión asturiana, tien una ventena de publicaciones académiques sobre la televisión, la mayoría centraes nos conteníos. Tamién foi profesor na Universidá Asturiana de Branu (UABRA), tien publicáu n'asturianu l'ensayu 'Historia de la televisión asturiana', primera investigación sobre esti mediu nel nuestru país, y en gallego-asturianu la novela 'El batallón Galicia'.

Pela so parte, Cuesta foi xerente de Blaster Comunicación y presidente de l'Asociación de Productores de Televisión d'Asturies, siendo anguaño direutor comercial de Proima-Zebrastur. Nun artículu espublizáu nel 2003, onde defendió la necesidá de la puesta en marcha d'una televisión autonómica, Cuesta faló de la so importancia pa la cultura y llingua asturiana. “A lo llargo de munchu tiempu, a los asturianos nun se nos permitió venos tal y como somos, y perdimos munchos aspectos que nos diferencien d'otres cultures”, sentenció'l productor, qu'añadió que la canal, “ensin dulda nenguna”, sería una arbía fundamental pal afitamientu y prestixu de la nuestra llingua. "Nun hai nengún país avanzáu que nun tenga televisión propia, igual que nun hai nengún país que nun tenga carreteres, teléfonos o periódicos”, afirmó.

Ente los cometíos del puestu ta dirixir y xestionar les árees de programación de RTPA, amás de la investigación d'audiencia, la confección de la programación y continuidá de los medios de radio, televisión y periódicu o'l portal d'Internet, incluyíes les compres y demás operaciones comerciales de too orde, de programes de terceros y cualquier otru productu y servicios oxetu de producción, comunicación pública, tresformación o esplotación y la negociación d'alcuerdos de coproducción, responsabilizándose de tolos conteníos que s'espardan al públicu y de la so forma de comunicación.

Reina, meyor colocáu según la CSI

Pese a que'l procesu d'escoyeta del direutor nuevu d'Antena y Conteníos ye al traviés d'un concursu públicu de seleición, la Corriente Sindical d'Izquierda (CSI) señala que “too apunta a que'l tribunal na solombra que formen PP, PSOE y IX yá escoyó a los candidatos”. “Caún de los partíos van poner a un direutivu de la so confianza, un axente que los tenga informaos de tolo qu'asocede en RTPA y xixile de cerca a Virgili”, aseguren dende'l sindicatu, que considera a Reina, casáu cola conceyala popular d'Avilés Ana María Bretón, como'l meyor colocáu pal cargu.

Creación d'una direición de Planificación Llingüística

Les trés direiciones a los que se-yos busca ocupante lleven ensin ocupar cuatro años, lo que llevó a la Xunta pola Defensa de la Llingua (XDLA) a afirma recién "que nun son necesaries”, solicitando al empar una de Planificación Llingüística que considera "imprescindible" pa garantizar la execución de les midíes sobre los medios de comunicación públicos incluyíes nel Plan de Dignificación de la Llingua Asturiana y nel alcuerdu d'Investidura ente la FSA-PSOE y IX. "Habría d'encargase d'impulsar l'usu de la llingua asturiana nes emisiones, mirando pola calidá tanto en términos normativizadores como normalizadores", esplicaron dende la organización cívica, que la cree básica dende'l mesmu momentu nel que se "confirmó l'ausencia de persones comprometíes colos derechos llingüísiticos na direición xeneral y na mayor parte del Conseyu d'Alministración nuevu".