Seis meses de xestión de Virgili ensin cambios col asturianu na RTPA

|

La XDLA critica la política de programación diglósica que ta llevando Antonio Virgili nos más de seis meses que lleva confirmáu nel cargu de direutor xeneral de la RTPA. "La programación n'asturianu ta baxo mínimos" denuncia'l coleutivu cívicu al tiempu que critica'l tratamientu al idioma en 'La batalla de los pueblos'.

Depués d'esti tiempu "yá podemos ver los primeros resultaos de la xestión d'una persona que diz ser 'partidaria' del asturianu: la programación n'asturianu ta baxo mínimos –más baxo mínimos de lo que yá taba–, nun existe programación infantil y xuvenil n'asturianu y hai añu y mediu que nun se dobla nenguna película al asturianu", señala la Xunta pola Defensa de la Llingua Asturiana (XDLA) con respeuto a la televisión pública. "Otro tanto se pue dicir de la RPA, onde la presencia del nuestru idioma y la nuestra música ocupa tantu espaciu como'l que-y dedica cualquier emisora de Madrid qu'emite en desconexón p'Asturies", añade.

A ello hai que sumar que "la producción cultural nin asoma nos 'TPA Noticias', que son siempre en castellanu, menos na Selmana de les Lletres, onde s'usa l'asturianu pa falar del asturianu y ehí acabó esti añu la programación especial". Una situación llaceriosa que nun se corrixe nos productos nuevos, como 'La batalla de los los pueblos, con conteníos en castellanu, como nel restu de la programación, nel que'l "presentador de turnu" usa lo que "entiende que ye asturianu, que pue ser falar con verbos compuestos pero dicir 'ye' y acabar les palabres en '-ina'".

Ún de los programas más caros de la historia de TPA

Nesti programa en concretu que s'emite los vienres de nueche, "incúmplese sistemáticamente la toponimia oficial y l'asturianu namás qu'aparez pa llamar les pruebes, con palabrines mui nuestres como 'xata' o 'patatines'. Pruebes, por cierto, tan identitaries como un güe con pintes –pa da-y un toque astur de vaca frisona– y un paisanu enriba con una montera picona. Too ello mentes la presentadora diz que ponga la montera, 'como buen asturiano'". En definitiva, un usu diglósico del idioma "como una manera d'averase al espectador, pero dando la sensación de que l'asturianu nun ye una llingua; ye una manera de falar con determinaes 'palabrines' diferentes del castellanu, que, nel fondu, ye la llingua seria, la que val".

Dende la XDLA recuerden que 'La batalla de los pueblos' "ye ún de los más caros producíos hasta la fecha pola RTPA, a lo qu'hai que sumar la creación de trés cargos directivos nuevos pal equipu d'Antonio Virgili. Parez que la prórroga presupuestaria namás ye sida pa Virgili si se fala de normalizar l'asturianu, de contratar a productores del país o de facer doblaxes, pero les perres nun importen si ye cuestión d'ayudar a les empreses afines y de meter más cargos na dirección. Too esto mentes la Dirección Xeneral de Planificación Llingüística y Normalización, que tien venti veces menos presupuestu que RTPA, entamó y pagó un cursu d'asturianu pa los trabayadores de la cadena".

Contador Estadistiques