Seis escritores van lleer poemes de Heaney nel homenaxe al irlandés qu’abre la Vagamar 2013

Esti vienres principia la Vagamar 2013 nel xixonés Antiguu Institutu. La primer xornada va tar dedicada a Seamus Heaney, escritor fináu recién al que L’Arribada va recordar cola llectura de poemes suyos por parte de seis escritores asturianos.

Asina, Xuan Xosé Sánchez Vicente, Miguel Rojo, David M. Rivas, Xuan Santori, Aurora García Rivas y Carmen Rueda van homenaxar la figura de Heaneay, fináu’l 30 d’agostu, faciendo un repás a parte de la so obra. Los seis conocíos escritores van lleer poemes del ganador del Nobel de Lliteratura del 1995 n’inglés, castellanu y asturianu, idioma ésti últimu que defendió mientres les sos visites a Asturies, demandando inclusive de manera pública la so oficialidá. Tres esta llectura cívica, que va principiar a les 19 hores y que lleva’l nome de ‘Seamus Heaney y Asturies’, Mento Hevia va dar un conciertu de raviola astúrica y la Coral Asturiana de Gijón va interpretar dellos cantares.

L’actividá de la Vagamar 2013, que nesta edición va tener continuidá n’ochobre y payares, va siguir mañana nel salón d’actos del Centru de Cultura Antiguu Institutu col actu institucional d’inauguración, previstu pa les 18.30 hores, cola presencia de representantes del Conceyu de Xixón y de l’Academia de la Llingua Asturiana. Darréu, yá nel patiu, va celebrase la entrega de los Premios Timón, que nesta ocasión son pa Miguel Rojo (VII Premiu Timón p’autores en llingua asturiana y eonaviego), Gonzalo Suárez (IV Premio Timón pa escritores asturianos en castellanu) y l’Asociación Cultural Ensame Sidreru, qu’algama la primer edición del Premiu Timón de Cultura Asturiana, dirixíu a asociaciones, sociedaes y fundaciones con sede n'Asturies que tengan como fin la conservación y promoción de la identidá cultural del país y qu'empleguen la llingua asturiana nes sos actividaes. La Coral Polifónica Anselmo Solar va actuar tres la entrega de gallardones, consistentes en pintures cerámiques realizaes pol artista plásticu xixonés Jesús Castañón, y Carlos Alba ‘Cellero’ va zarrar la xornada cola representación de ‘Llázaro de Tormes’.