“Seguro que se pue facer muncho más, pero fiximos coses importantes en toponimia y educación”, diz Padilla

Fernando Padilla dexó esti vienres de ser direutor xeneral de Planificación Llingüística y Normalización. Fai un balance positivu d’estos cuatro años, destacando avances en toponimia y educación, y llamenta’l probe tratamientu institucional y nun poder sacar alantre los decretos del currículum d'Infantil y el qu’afite la rellación de l’Academia de la Llingua Asturiana (ALLA) cola Alministración.

“La valoración que puedo facer nun ye más que positiva. Seguro que se pue facer muncho más, pero fiximos coses importantes en toponimia y educación”, aseguró a Asturies.com tres el pieslle oficial de la Universidá Asturiana de Branu (UABRA) celebrada nel paraninfu de la Universidá d’Uviéu, el so últimu actu públicu. “Acabamos los estudios toponímicos de tolos conceyos y fiximos la toponimia d’Uviéu que ye un sitiu emblématicu. Agora queden 12 conceyos por aprobala, dalgo qu’espero que se pueda facer na llexislatura próxima”, apuntó no que respeta al procesu de recuperación de los nomes de llugar tradicionales, mentes que nel tarrén del enseñu citó “el plan pilotu, que ye una esperiencia valorada positivamente por profesores, alumnáu y families; l’aumentu de la matriculación na materia; y el decretu de reconocimientu de los niveles d’asturianu, yá fechu, del que sólo queda convocar los esámenes”.

Nel llau contrariu, llamenta’l probe tratamientu institucional, “dalgo qu’espero que cambie esta llexislatura”, y el nun poder aprobar “dos decretos qu’entamamos y nun pudimos sacar alantre por dellos motivos”. El primeru ye’l currículum d’Educación Infantil, “que tien fechu tol articuláu, pero que nun salió por cuestiones presupuestaries”.

L’otru ye’l qu’afite “la rellación de l’Academia de la Llingua col Principáu. Hebo dellos problemes pol carauter priváu que la institución académica que tien por llei y que nun pue ser priváu porque nun lo ye; l’Academia ye una institución d’Asturies y pública”. Padilla esplica que “entovía nun se pudo facer un decretu afayadizu pa ello o una llei de l’Academia, pero supongo que pa esta llexislatura se podrá facer”.

Sobre l’equipu nuevu al frente de la conseyería y la direición xeneral, apuntó que “ye mui ilusionante”. Asina, destacó que la FSA lleve la oficialidá nel so programa eleutoral y que’l presidente Adrián Barbón emplegara l’asturianu na toma de posesión y en discursos públicosn y considera que nos próximos cuatro años “se siguirá avanzando na normalización de la llingua asturiana”.

Na semeya, Padilla observa como la direutora de la UABRA, María Cristina Valdés, asitiada xusto a la so izquierda, entrega un diploma a un alumnu.