Seguimientu masivu de los paros del tresporte nel tercer día de fuelga

|
Seguimientu masivu de los paros del tresporte nel tercer día de fuelga

Los convocantes UITA y Cesintra calculen nun 98% el paru del tráficu de camiones peles carreteres asturianes.

L’actividá de los piquetes informativos nun paró y la Guardia Civil informó que llevaba 323 servicios d’escolta a vehículos hasta ayeri. Dende qu’entamara la fuelga esti llunes, a lo menos seis camiones sufrieron rotures de llunes por llanzamientu de piedres o otros oxetos mientres taben circulando.

L’incidente más grave foi en Lluniego, Uviéu, onde un conductor recibió l’impactu d’un oxetu tiráu dende un pasu eleváu de la A-66. Tamién, un piquete obligó a un tresportista a salir de la A-8 pa pincha-y toles ruedes del camión que conducía a l’altor del ponte Los Santos. Amás, hubo de retirar clavos de la calzada nel kilómetru 30 de la A-66. Y un grupu de persones cortó la N-634 en Granda, y otru la salida de Mercasturias na madrugada del miércoles.

La FADE alerta de que yá ta afeutando a tola economía d’Asturies, y dende la Unión de Transportistas Autónomos (UITA) espliquen que tan llegando a alcuerdos con grandes empreses pa prestar unos servicios mínimos, como los que se tan cumpliendo yá cola recoyida de lleche o el repartu de piensu.

Semeya d'archivu

Contador Estadistiques