Secuestren una película n'Italia

Esta selmana, con motivu de les fiestes, la cartelera de cine adelántase unos díes. Nesti miércoles de véspora de vacaciones namás podemos dar anuncia d'una estrena, la de la versión remocicada d'ET l'Estraterrestre, que vuelve a los cines con más secuencies y un remasterizao dixital.De cualquier manera, la noticia cinematográfica del día nun tien que ver muncho con grandes ésitos de Hollywood nin col rellume de los Oscar. Ello ye que n'Italia un xuez de Roma ta acabante d'ordenar el secuestru de la película "Los banqueros de Dios" que reconstrúi l'escándalu de la quebra de la Banca Ambrosiana y les sos rellciones cola logia Propaganda Due, ún de los episodios políticos más escuros de la Italia contemporania qu'acabó chiscando a altos cargos políticos y al mesmu Vaticano. Pela película, que yá llevaba dos selmanes na cartelera italiana, desfilen el cardenal Paul Marcinkus, Karol Wojtila pañando perres pal sindicatu Solidarnosc, Licio Gelli, Bettino Craxi, Berlusconi y, por supuesto, Lucio Calvi, el presidente de la Banca Ambrosiana qu'apeció colgando de la ponte de Blackfriars de Londres en 1982. El repartu, de campanines, inclúi a dos grandes actores como Omero Antonutti y Rutger Hauer.El millonariu Flavio Carboni, del que tamién se fala na película y que ta implicáu nel sumariu del casu, anque nunca lu llamaron a declarar, punxo'l pleitu qu'acabó bloqueando la película por considerar que se-y faltaba al respetu. Pela so parte, el director Giuseppe Ferrara dixo que'l secuestru de la película ye un ataque a la llibertá d'espresión.