Sarkozy quier un G-20 sobre los derechos d'autor n'Internet

El presidente francés, Nicolas Sarkozy, anunció esti miércoles la so intención de convocar una xunta del G-20 pa tratar la protección de los derechos d'autor n'Internet.

"Espero qu'antes de (la xunta del) G-20 en Cannes (prevista pa primeros de payares) haya un conceyu de países del G-20 sobre l'asuntu de los derechos d'autor pa qu'intentemos avanzar de manera conxunta, y non unos contra otros, (sinón) unos colos otros", declaró al presentar les sos previsiones d'educación y cultura.
  
Anque nun mentó específicamente la conocida como llei Hadopi contra les descargues illegales, criticada dende numberosos sectores tanto nel so principiu como na so eficacia, el xefe del Estáu almitió qu'hubo "munchos tracamundios" nun asuntu "esaxeradamente difícil".
  
"Nun se pue per una parte siguir consumiendo como siempre imaxes, música, autores, creación, y nun garantizar el respetu a derechos de la propiedá d'aquel que punxo tola so emoción, tol so talentu y tola so creatividá", argumentó.
  
"Ye una cuestión que ye muncho más importante que l'aspectu económicu, porque'l día en que nun se remunere la creación, mátase la creación", añadió.
  
L'Hadopi ye una autoridá encargada de sancionar les infracciones a los derechos d'autor n'Internet creada por una polémica llei qu'establez la posibilidá de quitar l'accesu a Internet a los infractores.
  
La norma, que pasó una dura tramitación parlamentaria, tuvo que modificase tres el refugu parcial del Conseyu Constitucional y entró en vixencia n'ochobre. Nos trés primeros meses la oficina envió 100.000 cartes d'alvertencia a internautes sospechosos de descargase ficheros de manera illegal.