Santa María del Puertu y El Vaḷḷe/Valle del Lago, formes escoyíes na toponimia recuperada de Somiedo

|
Teitu en Somiedo

El decretu pol que se determinen los topónimos oficiales de Somiedo, los tradicionales, yá salió nel BOPA y va entrar a valir el 4 de xunetu. La Pola Somiedo ye’l nome de la capital, ‘El Puerto’ pasa a ser Santa María del Puertu y El Vaḷḷe va tener forma billingüe xunto con Valle del Lago.

La forma escoyida tanto pal conceyu como pa la capital foi, depués de munchos discutinios qu’allargaron l'aprobación del espediente, la terminada en ‘o’. Asina Somiedo ye la única oficial y non Somiedu, con un importante usu y recoyida nel Nomenclátor de l’Academia de la Llingua Asturiana.

Tamién cambia El Puertu, hasta agora reconocida pola Alministración como ‘El Puerto’, que queda finalmente como Santa María del Puertu. La única opción billingüe aprobada ye El Vaḷḷe/Valle del Lago.

Otres parroquies que recuperen el so nome de llugar tradicional son Aguinu (que sustitúi a ‘Aguino’), Clavichas (‘Clavillas’), El Coutu (‘El Coto’) y Viḷḷar de Vildas (Villar de Vildas), mentes que numberosos núcleos de población como Santiagu l’Hermu (‘Santiago), Arbichales (‘Arbellales’), Caunéu (‘Caunedo’) o Viḷḷamor (Villamor) tamién lo faen. D’igual forma, recuéyense topónimos hasta agora non reconocíos como Las Condiapinas, La Fonte la Ḷḷamera, El Gachu o El Pandu.

Cuatro conceyos pendientes

Cola aprobación de la toponimia de Somiedo, el conceyu númberu 74 en dar el pasu, namái queden 4 por completar el procesu. Son Cuideiru, Allande, Ibias y Navia.

Na semeya, un teitu n'iviernu en Somiedo.

AdxuntuTamañu
PDF icon BOPA toponimia oficial Somiedo484.11 KB
Contador Estadistiques