Sanidá va potenciar la figura de los farmacéuticos nos equipos asistenciales p’ameyorar el cuidáu de los pacientes

La Conseyería de Sanidad va impulsar la figura de los farmacéuticos dientro de los equipos multidisciplinares d’atención al paciente cola fin d’ameyorar la calidá del cuidáu sanitariu y los sos resultaos. “Queremos avanzar nesta llinia y consolidar una Xunidá de Xestión Clínica de Farmacia escelente”, afirma Francisco Del Busto.

La xornada ‘Integración del Farmacéuticu Hospitalariu nes Xunidaes Clíniques’, que se celebró ayeri nel Hospital Universitariu Central d’Asturies (HUCA), sirvió pa que’l conseyeru, qu’acudió a la inauguración, afondara nesta cuestión. En concreto, esta iniciativa entamóse col oxetivu d’identificar el valor qu’aporten los farmacéuticos nos equipos y tamién les sos responsabilidaes, tanto a nivel asistencial como docente y investigador-innovador.

Asina, médicos definieron l’apoyu que requieren de los farmacéuticos p’ameyorar la so práutica clínica y tomóse como referencia la esperiencia d’Estaos Xuníos, onde los profesionales de farmacia yá tán integraos nestos grupos. Del Busto, na so intervención, aseguró que l’atención a los problemes de salú, sobre manera aquellos más complexos, que requieren del conocimientu de diversos especialistes y el manexu de terapies nueves, “demanda cada vez más un intercambiu de saber y esperiencies ente integrantes d’amplios equipos multidisciplinares”.

“Ési ye’l camín nel que debemos avanzar, contando colos meyores especialistes de l’atención farmacéutica, profesionales qu’añaden valor al procesu asistencial y que promueven la utilización efeutiva, segura y eficiente de los medicamentos nun marcu d’asistencia integral y continua”, añadió. L’HUCA lleva yá meses dando pasos nesi sen, aumentado la dotación de profesionales con un farmacéuticu más pa l’atención a los pacientes con patoloxíes complexes de dispensación hospitalaria que recueyen la so medicación nel propiu centru.

Anguaño tolos tratamientos que reciben los pacientes hospitalizaos son revisaos por farmacéuticos especialistes y Sanidá quier avanzar nesta llinia pa que los enfermos qu’acuden a los servicios d’urxencies dispongan tamién d’un profesional qu’asegure’l medicamentu correutu, nel momento oportunu y nuna dosis adecuada, dalgo que se va estender a les árees de cuidaos intensivos por pidimientu de los propios profesionales de la UCI. L’oxetivu final ye que’l paciente, cuando llega al hospital, cuente con un farmacéuticu de referencia, igual qu’agora tien al so médicu o a la so enfermera.

Na semeya, Dolores Escudero, responsable de la UCI del HUCA; Ana Lozano, direutora de la Xunidá de Xestión Clínica de Farmacia del HUCA; Luis Hevia, xerente de l'área sanitaria IV; y Del Busto.