Sanidá pon la llucha contra los trestornos mentales como una prioridá

El Gobiernu defende un modelu d’atención basáu na detección precoz, el tratamientu de les enfermedaes severes y la llucha contra l’estigma y la discriminación social. Un 25 por cientu de la población vese afeutada en dalgún momentu de la so vida por dalgún tipu de trestornu mental.

La incidencia alta de les enfermedaes psíquiques lleva a la Conseyería de Sanidá a dar prioridá a l’atención a esti importante problema de salú, d’alcuerdu con dellos oxetivos: la detección temprana na infancia y adolescencia; la promoción de los tratamientos psicoterapéuticos, relegaos nos años últimos frente al recursu a la medicación; l’atención a los adultos con trestornos severos y la llucha contra l’estigma y la discriminación social. Con motivu de la celebración ayeri del Día Mundial de la Salú Mental subraya tamién la necesidá de que toles instituciones collaboren de forma activa pa que les aproximadamente 24.000 persones que sufren una enfermedá d’estes carauterístiques n’Asturies reciban una atención integral que refuerce los sos derechos.

La conseyería destaca’l rigor col que trabaya dende hai años nel país tanto no que se refier a la meyora de la calidá de los dispositivos d’internamientu como nel Plan de Salú Mental 2015-2020, un documentu qu’inclúi les llinies centrales de l’aición pa la llexislatura actual. Dichu plan prevé la creación de 254 places asistenciales nueves y un aumentu importante de los recursos humanos, sobre manera nes categorías de psicoloxía clínica, psiquiatría y enfermería especializada.