Sanidá va facer encuestes en 2.100 domicilios pa definir les llinies maestres del Plan de Salú nuevu

Esti miércoles va entamar una campaña d’encuestes a mayores de 14 años en 2.100 domicilios del país. L’oxetivu d’esta consulta, la tercera que se fai, ye obtener información sobre la salú de los asturianos de cara al Plan nuevu.

La Conseyería de Sanidá pide collaboración a la ciudadanía pa realizar esti estudiu. Salú Pública obtendrá información relevante sobre la salú de los asturianos al traviés d'un cuestionario nel que podrán espresar les sos opiniones, actitúes, estilos de vida, creencies y conductes venceyaes cola so salú. La encuesta permitirá tamién observar los cambios producíos con respeuto a los dos estudios anteriores, amás de conocer y siguir monitorizando la salú y calidá de vida percibida pola población; los vezos o estilos de vida; la utilización de los servicios sanitarios; la identificación de los grupos principales a riesgu na salú, nos vezos de vida y nel accesu a los servicios sanitarios; la detección de desigualdaes en salú por xéneru, edá, hábitat, orixe, discapacidá, economía y clase social; y observar y dar con cambios con respeuto a la primer y segunda campaña d’ Encuestes de Salú.

La que principia mañana, la tercera, va ser domiciliaria, con garantía plena de confidencialidá de los datos,  y en dos partes, la segunda ente marzu y abril del 2013. Tolos encuestadores van acudir a les cases acreditaos. La encuesta trátase d’una de les ferramientes básiques que definirán les llinies maestres del Plan de Salú, el documentu que va recoyer les iniciatives principales en política sanitaria del Gobieru pa los cinco años próximos.