Sánchez plantega una reforma de la Constitución española pa finar colos aforamientos

|
Pedro Sánchez

El presidente del Gobiernu estatal, Pedro Sánchez, pretende acabar colos aforamientos de los diputaos y senadores a esceición de los casos nos que los posibles delitos se cometieren nel exerciciu del cargu. Plantega una reforma 'express' de la Constitución española, pa lo que necesitaría l’apoyu del Partido Popular (PP).

Con esta midida, los responsables políticos podríen declarar como imputaos en casos que nada tienen que ver col so llabor na Alministración, como-y asocedería al líder del PP Pablo Casado pol so master na Universidad Rey Juan Carlos, polo que la iniciativa de Sánchez pue considerase un movimientu táuticu pa poner ente la espada y la parede a los populares al traviés d’una iniciativa que venía reclamando Ciudadanos. Nin xueces nin la familia real perderíen l’aforamientu en nengún casu, según la propuesta del PSOE.

“Si toos actuamos con altor de miras, esta reforma de la Constitución podrá entrar en vigor en tan sólo 60 díes dende que s’inicie la so tramitación nel Congresu”, apuntó’l presidente del Gobiernu, qu’espera contar col sofitu del conxunto de la Cámara pa, según dixo, los ciudadanos tornen a creer na política. Pa ello califica la midida d’una “una señal relevante, inequívoca, d’exemplaridá, solidaridá y empatía”.

Sánchez fixo esta anuncia nel trescursu del acto #Avanzamos, que se celebró esta mañana na Casa de América coincidiendo colos 100 días de gobiernu. Pa salir alantre ye necesario’l sofitu del PP, que cuenta con mayoría absoluta nel Senáu.

Semeya de Fernando Calvo.

Contador Estadistiques