Sánchez Lazo sofita la candidatura de García Granda al Rectoráu

El so apoyu públicu a Santiago García Granda pue ser clave na votación del xueves.

Pedro Sánchez Lazo fixo público ayeri un comunicáu nel que señalaba que García Granda adquiría una serie de compromisos de la so candidatura, amosando asina'l so sofitu a la del caderalgu de Química Física, que mañana va a la segunda vuelta de les eleiciones a rector de la Universidá d'Uviéu xunto a José Muñiz. Nun comunicáu, el caderalgu de Bioquímica y Bioloxía Molecular afirma que nun va incorporase nel equipu rectoral, pero que sí "velará pol cumplimientu d'estes midíes mediante la nuesa presencia nos órganos democráticos de participación universitaria".

Estes midíes son, no que se refier al alumnáu, garantizar que la representación estudiantil sía totalmente autónoma y independiente de los órganos de gobiernu universitarios, el pagu fraicionáu mensual de les tases universitaries y l'ameyoramientu del tresporte, con un serviciu llanzadera ente los diferentes campus. Mentes, no que respeuta al personal docente y investigador, refierse a la garantización d'una partida presupuestaria suficiente pa poner el fin a la so precariedá y iniciar de manera inmediata la negociación cola mesa d'un plan de promoción y estabilización del profesoráu a cuatro años.

Por último, sobre'l personal d'alministración y servicios, demanda tomar les midíes necesaries pa que recupere los derechos perdíos y adoptar midíes urxentes pa rexuvenecer la so plantiya.

Resultaos mui igualaos

Esta decisión de Sánchez Laso pue decantar la balanza hacia García Granda pa la segunda vuelta de mañana, que se presentaba mui abierta vistos los resultaos del xueves pasáu. Muñiz foi'l vencedor al sumar un 34 por cientu del votu ponderáu, poco más d'un puntu que Santiago García Granda (32,97) que, sicasí, foi l'aspirante que sumó más votos: 2107 por 2017. Sánchez Lazo algamó un 25,39 por cientu (1844 votos), mentes qu'Agustín Costa, l'únicu candidatu que nun sofitó'l 'respetu y fomentu de la llingua y cultura asturiana' na Universidá d'Uviéu, rexistró un curtiu 7,79 por cientu (360 votos).

Hai que destacar que García Granda vien utilizando mientres tola campaña l'asturianu en tolos sos comunicaos, amás de comprometése a dotar de mayor entidá a los estudios d'asturianu y a crear una Oficina de Normalización Llingüística na Universidá d'Uviéu, ente otres munches midíes.