Sánchez configura un Gobiernu de coalición “d’altu perfil políticu” ensin presencia asturiana

El Gobiernu de PSOE y Sumar caltién les 22 carteres de la llexislatura pasada –una, Mocedá y Infancia, de creación nueva–, con 13 ministros que siguen y 9 que salen. Igualdá pasa a manes socialistes y la coalición sigue contando colos cinco asientos que tenía Xuníes Podemos nun Executivu nel qu'Asturies nun tien representación.

“La qu’entama ye una una llexislatura d’altu perfil políticu y hemos contar con un equipu al altor. Un equipu d’altu perfil políticu, un Gobiernu solvente, un Gobiernu sólidu pa ufrir seguranza nun país nuna Europa, nun mundu, ximelgaos por grandes tresformaciones y desafíos”, espresó’l presidente Pedro Sánchez, que se refirió a los escoyíos pa formar parte del so Executivu como “persones capaces de xestionar, pero tamién de llegar a alcuerdos y d’esplicalos públicamente”.

Son 12 muyeres y 10 homes, con cuatro vicepresidencies con nome femenín: Nadia Calviño (primera y ministra d’Asuntos Económicos), Yolanda Díaz (segunda y ministra de Trabayu y Economía Social), Teresa Ribera (vicepresidenta tercera y ministra pa la Transición Ecolóxica y el Retu Demográficu) y María Jesús Montero (nueva vicepresidenta cuarta y ministra de Facienda y Función Pública). Gana pesu nel Executivu Félix Bolaños, ministru de Presidencia qu’incorpora Xusticia.

Sumar queda con 5 carteres, les mesmes que tenía Xuníes Podemos, cola novedá de contar con Sanidá (Mónica García) y con Cultura (Ernest Urtasun), mentes qu’Igualdá pasa a manes socialistes, con Ana Redondo al frente. Sigue Díaz con Trabayu; Pablo Bustinduy sustitúi a Ione Belarra en Derechos Sociales y Axenda 2030, qu’incorpora Consumu d’Alberto Garzón; y Sira Rego queda al frente del ministeriu nuevu, el de Mocedá y Infancia.

El restu de carteres van tar dirixíes por José Manuel Albares (Esteriores), Fernando Grande-Marlaska (Interior), Margarita Robles (Defensa), Pilar Alegría (Educación y Deportes, amás de vocera del Gobiernu), José Luis Escrivá (Tresformación Dixital), Isabel Rodríguez García (Cienca y Universidaes) y Luis Planas (Agricultura, Pesca y Alimentación), que siguen de la llexislatura pasada, y poles incorporaciones Óscar Puente (Tresportes), Ángel Víctor Torres (Política Territorial y Memoria Democrática), Jordi Hereu (Industria) y Elma Saiz (Seguridá Social). Per segunda llexislatura nun va haber asturianos nel Executivu estatal.

María Luisa Carcedo foi la última ministra de la FSA nel Gobiernu de Sánchez. Ocupó la cartera de Sanidá, Consumu y Bienestar Social en setiembre de 2018 en sustitución de Carmen Montón nel primer mandatu del madrilanu hasta l’arranque del segundu en xineru del 2020.

Na imaxe, Sánchez esta mañana en La Moncloa. Semeya de Pool Moncloa/José Manuel Álvarez.