Sánchez adelanta les xenerales al 23 de xunetu

“Comuniqué al xefe del Estáu la decisión de convocar un Conseyu de Ministros esta mesma tarde pa disolver les Cortes y proceder a la convocatoria de les eleiciones xenerales”, apuntó esti llunes, depués de la xornada eleutoral del 28-M, el presidente del Gobiernu estatal, Pedro Sánchez. Daos los plazos llegales, el 23 de xunetu ye la fecha na que va haber nueva cita coles urnes, en plenu periodu vacacional.

“Voi ser breve y trataré de ser tamién mui claru”, entamó con xestu seriu’l socialista nuna intervención en La Moncloa comunicada esta mesma mañana ensin posiblidá d’entrugues pa los periodistes. “Tomé esta decisión a la vista de los resultaos de les eleiciones celebraes ayeri”, apuntó Sánchez, que dixo asumir “en primer persona los resultaos y creo necesario dar una respuesta y someter el nuesu mandatu democráticu a la voluntá popular”.

Cola presidencia de la Xunión Europea nel horizonte, nel segundu semestre del añu, el socialista considera necesario “una clarificación sobre la voluntá de los españoles y les españoles, una clarificación sobre les polítiques que debe aplicar el Gobiernu de la nación y una clarificación sobre les fuercies polítiques que deben liderar esa fase. Sólo hai un métodu infalible pa solventar estes duldes, la democracia, y lo meyor ye que los españoles y españoles tomen la pallabra, se pronuncien ensin tardanza pa definir el rumbu políticu del país”.

Los 55 díes que marquen los plazos llegales lleven al domingu 23 de xunetu como fecha de celebración d’unes eleiciones que de, consumir tola llexislatura, deberíen celebrase’l 10 d’avientu. Va ser la primer vegada qu’unes xenerales tengan llugar en branu, en plenu periodu vacacional y con miles de persones fuera del so llugar de residencia y la posibilidá de tener qu’acudir a formar parte de les meses eleutorales, lo que podría afeutar a la participación como asocedió nes gallegues y vasques últimes aplazaes pola pandemia de COVID-19.

Diez díes pa llegar a alcuerdos

La primer consecuencia d’esta decisión sorpresiva de Sánchez ye la obligación a les fuercies a la so izquierda pa llegar a alcuerdos al rodiu de la iniciativa Sumar liderada por Yolanda Díaz. En diez díes dende la convocatoria, que se va oficializar mañana, ye necesario comunicar a la Xunta Eleutoral les coaliciones que se vayan formar de cara al 23-X y entovía l’alcuerdu pa incorporar a Podemos a la plataforma paez llonxanu.