San Miguel va rellatar la visión d'Asturies de trés viaxeres anglófones ente los años 1950 y 1975

|
Covadonga San Miguel

Esta conferencia forma parte de la programación mensual de l'Asociación Cultural Ástura nel Atenéu Obreru de Xixón.

'La mirada de trés esceicionales viaxeres anglófones na Asturies del sieglu XX (1950-1975)' ye'l nome de la charra que va poner Covadonga San Miguel mañana nel llocal asitáu na cai Cuadonga. La llicenciada en Filoloxía Inglesa y Filoloxía Hispánica, amás de Doctora pola Universidá d'Uviéu, que centra parte de les sos investigaciones na lliteratura de viaxes y el so análisis, va esponer datos del so estudiu 'Encuentros y Desencuentros con la España del siglo XX: estudio comparativo de la sociedad y los tipos humanos españoles en las obras de viajeras anglosajonas entre 1950 y 1975'.

La idea central del mesmu foi pescudar qué imaxe se proyeutara del Estáu y los sos ciudadanos nuna dómina mui concreta de la historia’l país al traviés de la mirada femenina d’aquelles quince 'arrechaes' que viaxaron a España demientres el réxime franquista y espublizaron les sos obres ente'l 1950 y 1975. "Nuna España onde’l turismu entamaba a aprucir y onde la conseña turística por escelencia yera'l famosu 'Spain is different' vamos ver qué papel xuega Asturies, la so historia, les sos xentes y la so cultura nes visites que mos faen Dorothy Loder, Violet Alford y Nina Epton, qu'asoleyaran nes sos obres de viaxes pela Península", espliquen dende Ástura.

La charra va comenzar a les 19.30 hores, con entrada llibre.

Semeya obra de Naomi Suárez.

Contador Estadistiques