Samuel Sánchez y Manuel Busto, trunfos del deporte asturianu nel fin de selmana

El ciclista asturianu Samuel Sánchez ganó esti fin de selmana la xubida a Montjuich que pesllaba'l calendariu profesional del añu, mientres el piragüista de Villaviciosa Manuel Busto llograba revalidar el campeonatu del mundu de marathon n'Australia.

Los trunfos pal deporte asturianu entamaron a llegar de sábadu en Perth, onde Manuel Busto llogró'l so quintu trunfu na preba de marathon en clase K1. Al día dempués, el piragüista de Villaviciosa ganó la preba de K-2, onde yá tien con esti dos títulos mundiales, corriendo xunta Oier Aizpurúa los 36 kilómetros

Esi mesmu domingu Samuel Sánchez, l'únicu ciclista non vascu del equipu Euskaltel Euskadi, repitió'l trunfu que yá llograre l'añu pasáu na clásica del castiellu de Montjuich, superando na crono a Carlos Sastre (CSC) que fuere'l más rápidu na parte en llinia de la carrera. El ciclista asturianu echó asina'l piesllu a una temporada en que por fín llogró imponese nuna etapa de la Vuelta a España.