Samuel Sánchez cree que “nun hai que dexar que muerra” l’asturianu

L’oru olímpicu en ciclismu en ruta en Beijing 2008 y líder del Euskaltel-Euskadi, Samuel Sánchez, mostróse favoratible a la oficialidá nel programa de radio d’Iniciativa pol Asturianu. “Nun hai que dexar que muerra” l’idioma, afirmó l’uviedín.

Nuna entrevista fecha por Samuel Gradín, responsable del programa ‘Iniciativa pol Asturianu nes ondes’, Sánchez faló de cómo ta preparando la temporada actual, col Giro como oxetivu primeru, de la so trayeutoria y del so sentir hacia la llingua del país. "La llingua asturiana ye dalgo mui de nueso y nun hai que dexar que muerra", señaló’l del Euskaltel-Euskadi, qu’añadió que "l'asturianu tendría de ser oficial". Nel trescursu del programa, l’uviedín amosó una bona conocencia del idioma.

Dende Iniciativa pol Asturianu amuesen la so satisfaición poles pallabres pa col asturianu de Sánchez, un personaxe públicu que ye referente pa munchos ciudadanos. Asina, el ciclista xúnese a otres personalidaes qu’amosaron la so postura favoratible a la oficialidá del idioma, como’l so colega Chechu Rubiera, l’actriz María Cotiello o’l cantante y músicu Mario Fueyo ‘Dark la eMe’, ente otros munchos

Sofitu a la concentración de mañana

El coleutivu cívicu que trabaya pola normalización del asturianu fixo tamién público güei una nota de prensa nel qu’espresa’l so apoyu a la concentración del profesoráu de Llingua Asturiana y Gallego-asturiano na Escandalera de mañana (18.30 hores) pa lluchar contra la precarización del idioma nel sistema educativu cola entrada de la Llei Orgánica pa la Meyora de la Calidá Educativa (LOMCE). Iniciativa refuga “la situación na que quedaría la Llingua Asturiana d’aprobase la reforma educativa nueva” y pide que se “reconoza yá la especialidá d'asturianu, pa que la situación del profesoráu nun seya de marxinación como agora”. D’igual forma, entiende que “l’asturianu ha ser una asignatura pa tolos alumnos, una asignatura normal, non una ‘optativa’ nin ‘voluntaria’, non enfrentada a otres materies”, y apuesta por “dar pasos pa que l’asturianu se considere llingua vehicular d’otres asignatures, buscando un modelu afayadizu p’Asturies que permita que l’asturianu seya llingua d’usu habitual nes aules”.