Sambre y Zapica, actuaciones destacaes d'esta fin de selmana

Sambre y Zapica van actuar esta fin de selmana. El grupu de rock va facelo n’Uviéu xunto colos checos Pipes and Pints y los estauxunidenses Born to Lose, mentes que la banda de folk va ambientar el Mercáu Ecolóxicu y Artesanu de Xixón.
 
L’Antigua Estación va acoyer el conciertu de Sambre xunto a dos bandes punteres na escena punk y punk-folk. Los asturianos, con un discu nel marcáu ‘Na solombra’, van actuar a les 19.30 hores, pa depués dar pasu a Pipes and Pintes y Born to Lose, que tan faciendo una xira conxunta per toda Europa. La entrada pal conciertu ye de 10 euros.
 
Pela so parte, Zapica va ufrir dos conciertos na Plaza Mayor de Xixón dientro del espaciu ‘A Mercar cola llingua’ qu’entama la Oficina Municipal de la Llingua de Xixón con motivu del Mercáu Ecolóxicu y Artesanu. El primeru d’ellos va celebrase’l sábadu a les 19.30 hores, mentes que’l segundu ta previstu pal domingu a les 19 hores. Zapica va entregar al públicu lletres de cantares tradicionales y de chigre pa qu’echen un cantarín xunto a ellos.
 
Esta fin de selmana va tar cargada d’actuaciones de primer nivel, como la de los navarros Koma, que van actuar estar tarde na sala Tribeca d’Uviéu (21 hores), o de los asturianos Desakato na sala Acapulco de Xixón (21 hores). El sábadu tamién destaquen los conciertos de The Clams (Centru Niemeyer, 20 hores), Albert Pla, Pascal Comelade y la pequeña orquesta de títeres Somiatruites (Teatru Xovellanos, 20.30 hores) y el debú de la banda de rock NueveConDiez (Café Dam, 22 hores). Mentes, el domingu va vivise una xornada de los ‘Domingos corales. L’añada asturiana’ (Antiguu Institutu de Xixón, 12 hores), cola participación de Grupo Coral Melisma y la Coral Villa de Jovellanos, y de la fase final del Concursu de Folclor Ciudá d’Uviéu (Teatru Campoamor, 12 hores).