Samartín, Siero y Mieres salen del riesgu estremu, mentes que Xixón sigue 14 díes más nel nivel 4+

Esti xueves detectáronse 188 casos nuevos, con una tasa de positividá del 6,75 por cientu.

Depués de que Cangas del Narcea abriera'l zarru perimetral güei, los siguientes en facelo van ser Samartín del Rei Aurelio y Siero, el sábadu, y Mieres, el domingu. Sigue en riesgu estremu Xixón, polo que les restricciones van siguir 14 díes más, con revisión nuna selmana, acumulando asina dos prórrogues.

Van ser, poro, 10 los conceyos en nivel d'alerta 4+, llista na que tamién tán Uviéu, Gozón, Carreño y Llaviana, amás d'Avilés, Corvera, Castrillón, Ḷḷena y Ayer, con midíes especiales al tener un nivel de tresmisión del coronavirus SARS-CoV-2 mui alta. Pa consultar la situación de tolos llugares y les normes vixentes en caún d'ellos l'Observatoriu de Salú n'Asturies tien activu un mapa na so web, na pestaña 'Mapas medidas'.

Quintu día perbaxo de 200 casos nuevos

A falta de la espublización de los datos oficiales de COVID-19, la Conseyería de Salú comunicó 188 contaxos ayeri –l'actualización incorpora 6 más hasta 194–. Son 27 más de les qu'informó nes cifres del martes, 26 tres l'actualización final que dexaba'l total en 162.

Fixéronse 4.279 pruebes de diagnósticu d'infeición activa, polo que la tasa de positividá asitióse nun 6,75 por cientu, superior a la del día anterior, cuando quedó nun 5,87 por cientu. A 7 díes, el martes esti porcentaxe yera del 6,58 por cientu –l'actualización báxala ayeri a un 6,51 por cientu–.

Na xornada hebo que llamentar 2 muertes, una muyer de 65 años y un home de 56. Dende qu'entamó l'andanciu finaron cola enfermedá causada pol coronavirus SARS-CoV-2 un total de 1.683 persones.

Hai hospitalizaos 445 pacientes con confirmación o sospecha de COVID-19, a los qu'hai que sumar otros 128 que tán na UCI. Son 14 y 2 menos que'l martes.

Na semeya, una terraza en Xixón, únicu espaciu que va poder utilizar la hostelería hasta'l 5 de marzu.