Samartín reclama a Renfe Operadora que recupere'l Tren de la Biosfera

Circulaba ente xunu y setiembre y suponía un atractivu turísticu grande pal valle del Nalón.

La conceyalía de Turismu del Conceyu de Samartín del Rei Aurelio ta acabante de reclamar a Renfe Operadora la recuperación del Tren de la Biosfera que mientres siete años, faciendo'l so serviciu últimu nel 2013, tresportó turistes procedentes de Xixón al valle del Nalón en branu pa visitar dalgunos de los principales atractivos culturales y recursos naturales de la cuenca'l Nalón. “Nun podemos renunciar un añu más a un serviciu que mientres siete años atraxo al valle a un fluxu considerable de turistes que facíen escala en Samartín pa visitar el Muséu de la Minería y la Industria y, posteriormente, s'averaben a Redes y tamién a Llaviana pa facer otres visites”, afirmó la edil Cintia Ordóñez.

Na carta unviada a la direición de la operadora ferroviaria d'entidá pública pa solicitar la recuperación del serviciu, Samartín del Rei Aurelio ufre la so collaboración a la entidá pública pa la puesta en marcha esti mesmu branu del Tren de la Biosfera, "yá sía nos mesmos términos nos qu'esti tresporte operó nel pasáu o con un plantegamientu nuevu no que se refier a la so xestión", apunten dende'l Conceyu.