Samartín reabre la Oficina de Normalización Llingüística na Casona del Bravial

El centru va funcionar llunes, martes, miércoles y vienres, n'horariu de mañana, y xueves, n'horariu de tarde, hasta final d'añu.

La Conceyalía de Cultura reabrió la Oficina de Normalización Llingüística, na Casona del Bravial, en Blimea, al traviés d'una subvención concedida pol Gobiernu. La finalidá d'esta oficina ye la promoción y normalización del usu de la llingua asturiana dende l'Alministración llocal en tolos ámbitos posibles: cultural, educativu o social por aciu del desenvolvimientu d'actividaes d'interés xeneral y utilizando tolos recursos y ferramientes posibles.

 “Per aciu d'una subvención de la Conseyería de Cultura reabrimos la oficina de normalización llingüística recuperando d'esta miente un serviciu fundamental dientro de la área de Cultura que nos dexó realizar actividaes de promoción del asturianu nos últimos años”, destacó la conceyala de Cultura, María Alonso.

Presentaciones, charres, esposiciones, collaboraciones con asociaciones del conceyu, ellaboración de documentos n'asturianu o presencia en redes sociales son dalgunes de les actividaes que se van llevar dende la Oficina de Normalización Llingüística na Casona del Bravial. L'atención al públicu va realizase con cita previa.